stv.uz сайти фотосурати
2025 йилнинг биринчи чорагида Ўзбекистонда 8 миллиард 700 миллион доллардан зиёд хорижий инвестициялар ўзлаштирилиб, ўтган йилнинг шу даврига нисбатан қарийб 20 фоизга ўсди. Бу ҳақда ҳукуматнинг иқтисодий блоги вакиллари республика президенти Шавкат Мирзиёевга маълум қилди, деб хабар қилади давлат раҳбари матбуот хизмати.
Расмийларнинг аниқлик киритишича, ушбу маблағлар қуйидаги соҳалардаги муҳим лойиҳаларни амалга ошириш учун мўлжалланган:
✅ энергетика;
✅ металлургия;
✅ кимё саноати;
✅ фармацевтика;
✅ транспорт;
✅ қишлоқ ва сув хўжалиги;
✅ коммунал ва ижтимоий соҳалар.
Бунда қўшилган қиймат ва иш ўринлари яратишга алоҳида эътибор қаратилмоқда.
Президент раислигида ўтган йиғилишда истиқболдаги прогнозлар эълон қилинди. Шундай қилиб, биринчи ярим йил якунига қадар 18 миллиард долларлик хорижий сармояни ўзлаштириш режалаштирилган. Жорий йил охирига қадар 42 миллиард доллар хорижий инвестиция жалб этилиши, 81 та йирик, 8 мингдан ортиқ ўрта ва кичик лойиҳалар амалга оширилиши кўзда тутилган.
Мутасаддиларга ҳар бир лойиҳа бўйича манзилли ишлаб, барча вазирлик, ҳокимлик ва тармоқ раҳбарларини жалб қилиб, тегишли масалаларни ўз вақтида ҳал этиб бориш юзасидан кўрсатмалар берилди.
Президент жаҳонда рўй бераётган иқтисодий ўзгаришлар фонида ҳар бир инвестор билан яқин ҳамкорликни йўлга қўйиш, хорижий инвестициялар самарадорлигини ошириш зарурлигини таъкидлади. Бунда истиқболли лойиҳаларни тезкорлик билан ишга тушириш, саноатни диверсификация қилиш ва юқори даромадли иш ўринлари яратишга устувор аҳамият бериш лозим.
