Конгратбай Шарипов. ТДИУ матбуот хизмати фотосурати
Президент фармони билан Конгратбай Шарипов Ўзбекистон Олий таълим, фан ва инновациялар вазири этиб тайинланди. Бу ҳақда мамлакат президенти матбуот котиби Шерзод Асадов маълум қилди.
Шарипов 1963 йил 24 мартда Қорақалпоғистоннинг Қўнғирот туманида туғилган. Тошкент ирригация ва қишлоқ хўжалигини механизациялаш муҳандислари институтининг қишлоқ хўжалигини механизациялаш факультетида таҳсил олган, техника фанлари доктори. Тошкентдаги Турин политехника университети ректори бўлган. 2019 йили Ўзбекистон Олий ва ўрта махсус таълим вазири ўринбосари лавозимида ишлаган. Ўша йилнинг ноябрь ойида у Тошкент давлат иқтисодиёт университети (ТДИУ) ректори этиб тайинланган эди. У бир пайтнинг ўзида ректор ва вазир лавозимларида ишлайдими ёки йўқми, ҳозирча хабар берилмаган.
ℹ️ Ўзбекистон Олий таълим, фан ва инновациялар вазирлиги раҳбари лавозими 2023 йил октабр ойида, амалдаги раҳбар Иброҳим Абдураҳмонов Қишлоқ хўжалиги вазири этиб тайинланганидан сўнг бўшаб қолган эди.
