news.ru сайти фотосурати
Тошкент ва Ашхобод Ўзбекистонга йилига 2 миллиард куб метргача туркман газини етказиб бериш бўйича келишиб олди. Бу ҳақда Ўзбекистон Энергетика вазирлиги раҳбари Жўрабек Мирзамаҳмудов Туркманистон давлат ахборот порталига берган интервьюсида маълум қилди.
Мулозимнинг таъкидлашича, 24 август куни UzGasTrade ва «Туркмангаз» ўртасида қисқа муддатли шартнома имзоланган. Мирзамаҳмудовнинг сўзларига кўра, Туркманистондан «зангори ёқилғи» етказиб бериш бўйича принципиал келишувга август ойи бошида ҳар икки республика президентларининг учрашувида эришилган.
Вазирлик бошлиғининг таъкидлашича, ушбу шартнома бўйича етказиб бериладиган туркман гази мамлакат ичидаги ортиб бораётган талабни қондиришга – аҳоли, иқтисодиёт тармоқлари, транспорт воситаларига йўналтирилади.
«Бу фақат бошланиши, чунки биз ўзаро манфаатли ҳамкорликни кенгайтиришнинг янада кенг истиқболларини муҳокама қилдик. Бу узоқ муддатга ва етказиб беришни кўпайтириш билан узоқ муддатли шартнома ишлаб чиқишни ўз ичига олади», — деди Энергетика вазирлиги раҳбари Ашхободга ташрифи якунлари ҳақида.
Унинг қўшимча қилишича, томонлар газ саноати соҳасидаги ҳамкорликдан ташқари, электр энергиясини етказиб бериш ва унинг учинчи давлатларга транзити, шунингдек нефть ва нефть маҳсулотларини импорт ва экспорт қилиш бўйича шартномалар тузиш масалаларини кўриб чиққан.
2022 йил декабрида Тошкент қишки мавсумда Ашхобод билан қўшимча 1,5 миллиард куб метр табиий газ импорти бўйича шартнома имзолаган эди. Бу импортнинг кунлик ҳажмини 15 миллион куб метрдан 35 миллион куб метргача ошириш ва газ тақчиллигини қоплаш имконини бериши маълум қилинди.
