Видеодан скриншот
Қозоғистоннинг шарқидаги Шарқий Қозоғистон вилоятида иккита йирик сув омбори — Зайсан ва Тарбагатай туманларидаги Уйдене ва Қандису авария ҳолатида деб тан олинди. Бу ҳақда “7 канал” хабар берди. Мутахассислар маълумотига кўра, гидротехник иншоотларнинг эскириши 70 фоизга етган, шу билан бирга уларда сўнгги 60 йил давомида капитал таъмирлаш ишлари амалга оширилмаган.
Дамбаларнинг қониқарсиз ҳолати туфайли сув омборлари чекловлар билан ишлатилмоқда ва қисман тўлдирилган. Бу эса ҳудудда суғориладиган ер майдонларининг қисқаришига олиб келган. Мумкин бўлган фавқулодда вазиятларнинг олдини олиш учун ҳокимиятлар мунтазам равишда иншоотларни текшириб боради ва сув ҳажмини назорат қилади.
Энг мураккаб вазият Уйдене сув омборида сақланиб қолмоқда. Унинг лойиҳавий сиғими 75 млн кубометрни ташкил этади, аммо ҳозирда тўлдириш ҳажми 46 млн кубометр билан чекланган.
Зайсан тумани ҳокими Ермек Қорабаев маълум қилишича, Уйдене реконструкцияси лойиҳаси техник эътирозлар сабаб бир неча бор қайта кўриб чиқилган. “Қазводхоз” давлат корхонаси вакилларининг айтишича, аввал тайёрланган лойиҳа-смета ҳужжатлари давлат экспертизасидан салбий хулоса олган, шундан сўнг лойиҳа ташкилоти билан шартнома бекор қилинган. Ҳозирда ҳужжатларни тузатиш ишлари корхонанинг ўзи томонидан олиб борилмоқда.
Уйдене дамбасини тиклаш бўйича якуний лойиҳа жорий йил октябригача тасдиқланиши режалаштирилган, шундан кейин молиялаштириш учун бюджет маблағлари жалб қилинади.
Қандису сув омбори учун эса батафсил реконструкция режаси аллақачон тайёрланган. Таъмирлаш ишларини шу йил бошлаш режалаштирилган.
Уйдене ва Қандису дамбаларини таъмирлаш ҳақида ҳокимиятлар 2024 йили ҳам гапирган, ушбу ишлар 2–3 йил ичида якунланиши режалаштирилган эди, аммо бу ишлар амалга ошмаган.
