Александр Бастрыкин. Видеокўрсатувдан кадр
Россия Тергов қўмитаси раиси Александр Бастрыкин РФдаги мигрантлар сони МҲО (махсус ҳарбий операция) зонасига юбориш орқали қисқартирилаётганини «топқирлик» деб атади.
«Бир йил аввал мен бўлинмаларимизга мигрантлар билан ишлаш бўйича маҳаллий гуруҳларни тузиш бўйича кўрсатма бергандим. Биз бошқа ҳуқуқ-тартибот идоралари ходимлари билан биргаликда рейдларда фаол қатнашамиз. Биз, биласизми, мигрантларнинг аста-секин Россия Федерациясини тарк этишига олиб келган ажойиб бир «топқирлик»ни ўйлаб топдик.
«Топқирлик» нимадан иборат эди? Биз Конституциямиз ва қонунларимизда фуқароликни олган шахслар ҳарбий хизмат рўйхатидан ўтишлари, зарур ҳолларда махсус ҳарбий операцияда қатнашиши кераклиги тўғрисидаги қоидаларини ҳаётга татбиқ эта бошладик», —
деди Бастрыкин 27 июнь куни Петербург халқаро юридик форуми (ПХЮФ) доирасида бўлиб ўтган «Замонавий Россияда миграция сиёсатининг ҳуқуқий жиҳатлари»га доир мажлисда.
Тергов қўмитаси раҳбарининг сўзларига кўра, Россияда фуқароликни олган, аммо ҳарбий хизмат рўйхатидан ўтишни истамаган 30 мингдан ортиқ хорижлик «қўлга олинган». Улар рўйхатга олинган ва 10 мингга яқини Шимолий ҳарбий округ зонасига жўнатилган.
«Нега улар у ерда керак, дея биздан сўрашади. Ўртоқлар, хандақ қазиш ва истеҳкомлар қуриш учун. Бунинг учун меҳнаткаш қўллар керак. Бугун улар бизнинг фронторти бўлинмаларимиз сафига қўшилишмоқда», — деди Бастрыкин.
Тергов қўмитаси раҳбари Россияда миграция сиёсатини амалга ошириш режаси («бизда шундай сиёсат борлиги маълум бўлди», — деди Бастрикин) асосан мигрантларнинг мослашуви билан боғлиқлиги, «лекин режада мамлакатда миграция оқимини камайтириш вазифасини қўядиган бирон бир пункт йўқ»лигидан ғазабланди.
Мулозим маҳаллий меҳнат ресурсларидан тўлақонли фойдаланиш эвазига миграция сиёсатини тубдан ўзгартиришни илгари сурди.
«Менимча, энг муҳими, Россиянинг миграция сиёсатини ўзгартириш, заруратни аниқ асослаб бериш лозим ва шундай қилиш керакки, ички ресурслар, ички миграциядан фойдаланган ҳолда иқтисодий, сиёсий, миллий ва бошқа муаммоларимизни ҳал қилайлик», — дея хулоса қилди Бастрыкин.
👉 Тергов қўмитаси раҳбари, шунингдек, қачон Давлат Думаси («Государственная Дума») депутатлари мигрантлар билан боғлиқ кескин вазиятни юмшатадиган «яхши қонунлар»ни қачон қабули билан қизиқди. Шу билан бирга, Бастрыкин «государственная дура» («давлат аҳмоғи») иборасини ишлатиб, йиғилганлар кулгисига сабаб бўлди.
