Нефтчилар намойиши. Видеодан кадр
Қозоғистоннинг Манғистов вилояти, Жанаўзен шаҳрида «Озенмунайгаз» нефть компанияси ишчилари бир соатга ишларини тўхтатдилар. Улар шу йўл билан маҳаллий фаол Муратбай Жумагалиевнинг ҳибсга олинишига қарши норозилик билдиришди, деб хабар беради Озодлик радиосининг минтақавий броси — «Азаттык Азия».
Нефтчиларнинг иш ташлаши акс этган видео интернетда тарқалган. Кадрда бир киши республика президенти Қосим-Жомарт Тўқаевга мурожаат қилиб, Жумагалиевнинг озод қилинишини таъминлашда ёрдам сўраган. Намойишчи фаолнинг «турли ҳийла-найранглар орқали қўйилган сохта айбловлар» билан ҳибсга олинганини даъво қилади.
«Озенмунайгаз» ходими ватандошининг ҳибсга олиниши ҳақида Муратбайнинг фаоллиги ва адолат учун кураши беҳуда кетганини айтди.
«Ҳар биримиз билан шунга ўхшаш воқеа содир бўлмаслигига ким кафолат бера олади?» — дея ўртага риторик савол ташлайди нефтчи.
Намойишчилар талаблари бажарилмаса, ишни бутунлай тўхтатиш билан таҳдид қилишган.
Намойишчилардан бири журналистларга видео 4 июнь куни кечқурун завод биноси ёнида суратга олинганини айтган. Гувоҳнинг қўшимча қилишича, Жанаўзен прокурори тез орада воқеа жойига етиб келган. Шаҳар назорат маҳкамаси раҳбари нефтчилар нима учун иш ташлашганини ва йиғилганларни иш кунида бундай йўл тутмаслиги кераклигини айтиб, танқид қилган.
Жумагалиевнинг ҳибсга олингани ҳақида 4 июнь куни хабар берилган. У гиёҳванд моддалар билан боғлиқ жиноятларда айбланмоқда. Интернетда фаолнинг полиция машинаси ёнида махсус полиция кучлари томонидан ўралгани тасвирланган видео тарқалган. Жумагалиевнинг ўзи «чўнтагига ноқонуний моддалар айтайин ташлаб қўйилгани»ни айтган.
«Азаттык» хабарига кўра, унинг адвокати Ойгул Айжаркова ўша куни кечқурун у билан учрашган. Аёлнинг сўзларига кўра, мижози ўзини айбдор деб ҳисобламагани учун кўрсатма беришдан бош тортган. Бироқ, унинг ҳимоясига кўра, тергов аллақачон экспертиза ўтказган ва Жумагалиевда 108 грамм гиёҳванд моддалар борлиги ҳақида хулоса чиқарган.
ℹ️ Муратбай Жумагалиев — Жанаўзеннинг энг таниқли фуқаролик фаолларидан бири, 2011 йили нефтчилар иш ташлашида иштирок этган, ўшанда норозилик намойишлари тарқатиб юборилиши натижасида 17 киши ҳалок бўлганди. Ушбу воқеалардан сўнг, у оммавий тартибсизликларда иштирок этганликда айбланган 37 нафар судланувчи қаторида бўлган ва уч йиллик шартли қамоқ жазосига ҳукм қилинган.
Фаол рухсатсиз митингларда иштирок этгани учун бир неча бор маъмурий жавобгарликка тортилган, 2011 йилги воқеалар бўйича янги тергов ўтказишни, сиёсий маҳбусларни озод қилишни талаб қилган ва мамлакат президентини танқид қилган.
