Америкалик актёр Арманд Ассанте «Ипак йўли дурдонаси» XIV Тошкент халқаро кинофестивалининг очилиш маросимига бошчилик қилади. Бу ҳақда кинофестивал ташкилотчилари «Фарғона» ахборот агентлигига маълум қилди.
Ассанте Ридли Скотт, Андрей Кончаловский ва бошқа машҳур режиссёрлар фильмларидаги роллари билан танилган. У ўзбек томошабинларига Баҳодир Йўлдошевнинг «Улуғбек. Осмон тоқига қўйилган нарвон» картинасидаги Мирзо Улуғбек роли билан таниш.
Кинофестивалнинг тантанали очилиш маросими 14 сентябрь куни Кинематографлар уйида (собиқ «Панорамий» кинотеатри) бўлиб ўтади.
Аввалроқ Голливуд тандеми – актёр Жонни Депп ва режиссёр Эндрю Левитас XIV Тошкент халқаро кинофестивалида «Минамата» фильмини тақдим этиши маълум бўлганди.
