akipress.org сайти фотосурати
Қирғизистон Жогорку Кенеши (парламенти) депутатлари судялик лавозимига фақат давлат тилини яхши биладиган фуқаролар тайинланадиган қонун лойиҳасини биринчи ўқишда маъқуллади. Халқ вакилларининг қарори ҳақида парламент матбуот хизмати хабар берди.
Қонун лойиҳасини шарҳлар экан, депутат Шайирбек Ташиев мазкур ҳужжат давлат тилининг ҳуқуқий асосларини мустаҳкамлаш ва Қирғизистон фуқароларининг барча тоифалари учун одил судловдан тенг фойдаланишни таъминлаш мақсадида ишлаб чиқилганини таъкидлади. Бундан ташқари, унинг сўзларига кўра, шу йўл билан республика процессуал қонунларидаги бўшлиқ бартараф этилади.
Парламент вакилининг қўшимча қилишича, судяларга қўйиладиган талаблар орасида бошқа жиҳатлар ҳам бор. Шундай қилиб, уларнинг оғир ёки ўта оғир жиноятлар учун судланганлиги аниқланган яқин қариндошлари бўлмаслиги керак. Бироқ, Ташиев таъкидлашича, мазкур янги талаб фақат лавозимга қўйиладиган номзодларга тааллуқли бўлади, сайланган ёки амалдаги судяларга эмас.
Қонун лойиҳаси муҳокамаси чоғида депутат Айсулу Мамашова Олий ва Конституциявий судлар судяси лавозимига кўрсатилган номзодларнинг интизомий жазога тортилмаганлигини назарда тутувчи норма киритишни таклиф қилди. Ҳамкасблар бу ташаббусга рози бўлишди.
ОАВ таъкидлашича, ҳужжатда фақат қирғиз тилини камида В1 даражасида биладиган фуқаролар судялик лавозимига даъвогарлик қилиши мумкинлиги таъкидланган. Халқаро баҳолашга кўра, бу даража «ўртача» деб номланади. Шу билан бирга, бунда одамлар суҳбатдошнинг кундалик ҳаётда айтганларини тинглаб, тушуна олади, кундалик ва касбий мавзуларни муҳокама қилишда қийинчиликсиз эркин тилда гапира олади.
