Ўзбек курашчилари. gazeta.uz сайти фотосурати
Эркин кураш бўйича Ўзбекистон ёшлар терма жамоаси 7,8 магнитудали зилзила маркази бўлмиш Туркиянинг Қаҳрамонмараш шаҳрида бўлган. Бу ҳақда Ўзбекистон Миллий Олимпия қўмитасининг (МОҚ) расмий сайтида хабар берилди.
Ўзбекистонлик полвонлар 3-6 февраль кунлари Қаҳрамонмарашда бўлиб ўтган халқаро мусобақаларда иштирок этишган. МОҚ матбуот хизмати таъкидлаганидек, спортчилар ва мураббийлар штаби аъзолари соғ-саломат. Ўзбекистон элчихонаси уларни Анқара-Истанбул-Тошкент йўналиши бўйича ватанларига жўнатиш чораларини кўрмоқда. Терма жамоани ўз ватанига қайтариш ишларига Ўзбекистон спорт курашлари ассоциацияси бош котиби Шуҳрат Мамадалиев бошчилик қилади.
Туркияда курашчилардан ташқари бошқа спорт турлари бўйича Ўзбекистон терма жамоалари ҳам у ерда ўқув-машғулот йиғинларини ўтказмоқда. Демак, велоспорт бўйича миллий терма жамоа Аланияда, байдаркачилар Белекда. Зилзила бу ҳудудларга кўп таъсир кўрсатмади ва машғулотлар режага мувофиқ давом этмоқда.
Қолаверса, Ўзбекистон футбол ассоциацияси ҳам Туркия йиғинида бўлиб турган бир нечта футбол клублари ва турли ёшдаги терма жамоалар аъзоларининг саломатлиги яхшилиги ҳақида расмий маълумот берди.
Ўзбекистон Республикаси президенти Шавкат Мирзиёев Туркия Республикаси Президенти Ражап Таййип Эрдўғонга ҳамдардлик йўллаб, Туркияга Фавқулодда вазиятлар вазирлигининг қутқарувчилар гуруҳи ва махсус техниклар юборилиши бўйича топшириқ берди.
Туркияда 6 февраль куни эрталаб бир неча соатлик фарқ билан 7,8 магнитудали иккита зилзила содир бўлди. Зилзила эпимаркази мамлакат жануби-шарқидаги Қаҳрамонмараш шаҳрида жойлашган. Қўшни Суриянинг шимолий ҳудудлари ҳам жабр кўрган. 1500 дан ортиқ уйлар, жумладан, кўп қаватли уйлар вайрон бўлган. 7 февраль куни эрталаб қурбонлар сони 4300 кишидан ошган, 15 мингдан ортиқ киши жабрланганлар сифатида қайд этилган. Туркияда ҳалок бўлганлар учун етти кунлик миллий мотам эълон қилинди.
Ўзбекистон Республикаси Ташқи ишлар вазирлиги Туркияда бўлиб турган ҳамюртларга зарур ҳолларда Ўзбекистоннинг Анқарадаги Элчихонаси (+90-312-441-38-71, +90-312-441-17-46) ёки Истанбулдаги Бош консулхонасига (+90-212-323-20-37, +90-212-323-20-39) мурожаат қилишлари мумкинлигини маълум қилди.
