Ўтган ҳафта охирида Совет ва Қозоғистон махсус хизматлари ходими, генерал-майор, Қозоғистон Миллий хавфсизлик қўмитасининг собиқ раиси Алнур Мусаев АҚШ президенти Дональд Трамп Совет контрразведкаси томонидан ёлланганини маълум қилди. Бу бизнесменнинг 1987 йили СССРга ташрифи пайтида содир бўлган. Мусаевнинг таъкидлашича, у ўша пайтда капиталистик мамлакатлардан ишбилармонларни оғдириш билан шуғулланадиган СССР КГБ (Давлат хавфсизлик қўмитаси)сининг Москвадаги олтинчи бошқармасида ишлаган.
«Айнан ўша йили бошқармамиз томонидан «Краснов» тахаллуси остида америкалик 40 ёшли бизнесмен Дональд Трамп ёлланган эди»,
— деб хабар берди у Facebook (РФда экстремистик деб тан олинган ва тақиқланган Meta корпорациясига тегишли тармоқ) даги саҳифасида.
Ушбу материал ёзилган пайтида мазкур пост икки минг мартадан кўпроқ нашр қилинди. Шарҳловчилар Мусаев сўзларининг тўғрилиги устида бош қотиришди ва унинг таржимаи ҳолидаги фактларни солиштиришди (очиқ манбаларда унинг КГБ олтинчи бошқармасидаги хизмати ҳақида ҳеч қандай маълумот йўқ). Фойдаланувчилардан бири ҳатто пост остида ФТБ (Федерал текширув бюроси)нинг расмий аккаунтини белгилаб қўйган.
Алнур Мусаев — Қозоғистон биринчи президенти Нурсултон Назарбоевнинг собиқ яқин ҳамкорларидан бири бўлган. 2007 йили у Назарбоев режимининг кескин танқидчисига айланади ва сиёсий қочқин мақомини олган ҳолда Вена шаҳрига кўчиб ўтади. Ўз ватанида собиқ чекист уюшган жиноий гуруҳ тузиш, ҳокимиятни зўравонлик билан эгаллаб олишга тайёргарлик кўриш ва жосусликда айбланиб, сиртдан судланган.
Мусаев ижтимоий тармоқларда фаол ва у Трамп ҳақида биринчи марта ёзаётгани йўқ — 2018 йили у Трампни «идеал ёлланиши мумкин бўлган одамлар тоифасига мансуб» эканини ва Россиянинг АҚШ президентига нисбатан компроматлари борлигини таъкидлаган. Қозоғистонлик генерал-майор илгари ҳеч қанақа агент Красновни тилга олмаган эди.
«Афтидан, Алнур Алжапарович эски ўйинни ўйнашга ва дунёга ўзи ҳақида эслатиб қўйишга қарор қилган ёки унинг европалик кураторларидан бири ундан шу ҳақда сўраган кўринади», — дея изоҳлайди қозоғистонлик сиёсатшунос Данияр Ашимбаев Мусаевнинг мазкур баёнотини.
Маҳаллий оммавий ахборот воситалари бу мавзуни чўзишмади, Россия матбуоти ҳам, мазкур кашфиётнинг бирламчи нишони бўлган Ғарб ОАВларининг аксарияти бу постни эътиборсиз қолдирдилар.
Британиянинг The Mirror таблоиди бундан мустасно бўлди. Мусаев баёнотини шарҳлар экан, нашр 2017 йили қисқа муддат Оқ уйнинг алоқалар бўйича директори лавозимида ишлаган Энтони Скарамуччи сўзларини келтиради. У президентга сирли тарзда «таъсир ўтказилаётгани»ни айтган. Скарамуччи бу нимада зоҳир бўлаётганига ойдинлик киритмаган ва фақат қўшимча қилган: «нега бундай содир бўлаётганини билмайман».
Американинг The Daily Beast сайтида ҳам гўёки ёлланган президент ҳақидаги мақола чоп этилган, бироқ у зудлик билан олиб ташлангани хабар қилинган. Бироқ, мавзу ижтимоий тармоқларда, хусусан Х-да (собиқ Twitter) катта қизиқиш уйғотди, у ерда krasnov хештеги пайдо бўлди ва нейротармоқ томонидан яратилган кўплаб тасвирлар пайдо бўлди.
Кўплаб шарҳловчилар учун Қозоғистон хавфсизлик хизмати собиқ ходимининг асоссиз сўзлари Трампни Кремлга ишлаганликда айблаш учун етарли бўлди. Сўнгги ўттиз тўққиз йил ичида шунга ўхшаш миш-мишлар бир неча бор пайдо бўлган, аммо ҳар сафар улар ўз-ўзидан тинчиб кетган. Зеро, ёлланиш фактини Красновнинг шахсий ишини тақдим қилмасдан исботлаб бўлмайди, бироқ бу каби «ҳақиқат»ни илгари сурадиган шахснинг суддан боши чиқмаслиги — бу турган гап.
