ulysmedia.kz сайти фотосурати
Россияга ишлаш учун келган бир гуруҳ қозоғистонликлар Қозоғистон ҳукуматига мурожаат қилиб, уларни ватанига қайтаришни сўрашди. Эркакларнинг айтишича, уларни алдов йўли билан Россия Мудофаа вазирлиги билан шартнома имзолашга мажбур қилишган, шундан сўнг Украинадаги жанговар ҳаракатлар ҳудудига жўнатишга тайёрлай бошлашган. Бу ҳақда Ulysmedia.kz хабар берди.
Йигитларнинг таъкидлашича, дастлаб гуруҳда 15 нафар қозоғистонлик бўлган. Ҳозир, уларнинг сўзларига кўра, тўққиз ёки ўн киши қолган — қолганларни урушга жўната бошлашган.
Жанговар ҳаракатлар ҳудудига бориб қолганлардан бири — 1999 йилда туғилган Жусип Шахназар Ерболатули бўлади. Унинг яқинлари айтишича, у Россияга вахта усулида ишлаш учун келган.
«Мен Россия ва Украина ўртасидаги урушда қолиб кетган қозоғистонликлардан бириман. Мен билан бирга яна саккиз нафар йигит бор. Биз сиздан ҳар қандай ёрдам кўрсатишингизни сўраймиз. Бизда атиги уч кун қолди», — деди у видео мурожаатида.
Россияда қолиб кетган яна бир қозоғистонлик, 19 ёшли Қайсар Алмаз ҳам худди шундай баёнот берган. «Урушга жўнатиш бошланди. Гуруҳимиздан бир йигитни олиб кетишди. Бизда атиги уч кун қолди. Қозоғистоннинг бутун халқидан ёрдам сўраймиз», — дейди у.
Қайсарнинг сўзларига кўра, ёшлар элчихона ва адвокатларга мурожаат қилган. Уларнинг таъкидлашича, улар урушда иштирок этишни режалаштирмаган, ҳужжатларни эса босим остида имзолаган.
«Бизни алдашди. Биз ҳеч нарсани ўз хоҳишимиз билан имзоламадик. Бизга куч ишлатиб, мажбуран имзо қўйдиришди», — дейди у.
Ulysmedia.kz аввалроқ ушбу қозоғистонликлар гуруҳи ҳақида ёзган эди. Уларнинг айтишича, Россияга қўриқлаш агентлигида ишлаш учун келган, бироқ ҳужжатларни расмийлаштиргандан сўнг шартлар бошқача эканини билиб қолишган: ё урушга боришади, ёки узоқ муддатга қамоқ жазосини олишади.
Улар орасида Шимкентлик 19 ёшли Айнабек Келдебек ҳам бўлган. У ҳарбий хизматни ўтаб бўлгач, ломбардда қўриқчи бўлиб ишлаган, 27 август куни эса дўстлари билан бирга Россияга жўнаб кетган.
Унинг онаси Перизат Елеусизованинг айтишича, ўғли рус тилини яхши тушунмайди ва унга имзолаш учун берилган ҳужжатларни тушуниб етмаган. У «Барис» қўриқлаш агентлигига ишга кираётганига ишонган.
«Қўриқлаш агентлиги ҳақида дўстимдан эшитдим. Биз уч киши бўлиб келдик. Бизни ишлайсизлар, деб айтишди. Бизни алдашди ва ҳужжатларни имзолатишди. Кейин эса: бўлди, энди урушга борасизлар, дейишди. Ё урушга борасизлар, ёки 15 йил қамаласизлар. Биз қўрқиб кетдик, бошқа чора қолмагани учун шу ерда қолиб кетдик», — деб айтган Айнабек.
Онаси сўзларига кўра, ёш йигит полигонда бўлган ва деярли ҳар куни уни қачон олиб кетишлари мумкинлигини сўраган. У қочиш ҳақида ҳам ўйлаган, бироқ онаси уни бу фикридан қайтарган. Унинг айтишича, оила бошқа бир ёш йигит қочишга уринганида унга оёғидан ўқ узилгани ҳақида эшитган.
Дастлабки мурожаатлардан сўнг Қозоғистон Ташқи ишлар вазирлиги Россия томонига дипломатик нота юборди.
2 октябрь куни Қозоғистон Ташқи ишлар вазири Мухтор Тлеуберди Россиянинг Қозоғистондаги муваққат ишлар вакили Александр Комаров билан учрашган. Ўшанда Ташқи ишлар вазирлиги маълум қилишича, томонлар жанговар ҳаракатлар ҳудудида қолиб кетган қозоғистонликлар билан боғлиқ вазиятни муҳокама қилган ва «уларни Ватанга қайтариш бўйича қўшма ҳаракатларни ишлаб чиқишга келишган».
Бу жараёнга Қозоғистоннинг Россиядаги элчихонаси ҳам қўшилгпн — элчи Дәурен Абаев Россия Ташқи ишлар ва Мудофаа вазирликлари вакиллари билан учрашувлар ўтказиши керак.
Айни пайтда ёшларнинг ўзлари вақт тобора камайиб бораётганини айтишган. Сўнгги мурожаатдан кўринишича, гуруҳ аста-секин қисқармоқда ва қолганлар яқин кунларда жанговар ҳаракатлар ҳудудига жўнатилиши мумкин.
