Талгат Татубаев. tengrinews.kz сайти фотосурати
Қозоғистонда Коррупцияга қарши курашиш миллий бюросининг собиқ раҳбари Талгат Татубаев қўлга олинди, деб хабар беради Республика Бош прокуратураси.
У Қозоғистон Жиноят кодексининг 146-моддаси 2-қисми («Шафқатсиз, ғайриинсоний ёки қадр-қимматни камситувчи муомала, қийноқлар») билан айбланмоқда.
Ҳозирда қўшимча далиллар тўплашга қаратилган судга қадар тергов ҳаракатлари давом этмоқда. Бошқа маълумотлар ошкор этилмайди, дейилади хабарда.
Тутубаев 1976 йил 9 октябрда Қарағандада туғилган. У ҳуқуқни муҳофаза қилиш органларида 20 йилдан ортиқ ишлаган. 2016 йил сентябридан 2018 йил июнига қадар Коррупцияга қарши курашиш миллий бюроси раҳбари бўлган. Кейинчалик у Бош прокуратуранинг Жиноят тергов хизмати бошлиғи этиб тайинланган, сўнгра Адлия вазири маслаҳатчиси лавозимида ишлаган. 2022 йил январида юз берган давлат тўнтаришига уринишлардан сўнг Татубаев Адлия вазирлигини тарк этган.
У II даражали «Құрмет» ва «Даңқ» орденлари билан тақдирланган. Ҳуқуқни муҳофаза қилиш ва махсус давлат органлари раҳбариятининг президентлик захирасидан жой олган.
«Время» газетасининг ёзишича, кўпчилик Татубаевни собиқ сенатор ва молия полицияси раҳбари Қайрат Қўжамжаровнинг энг яқин кишиларидан бири деб ҳисоблайди. Шунингдек, нашрнинг ёзишича, Татубаев БТА Банк иши бўйича судланувчиларга нисбатан қийноқлар қўллаганликда гумон қилиниши мумкин.
Эслатиб ўтамиз, Қозоғистон президенти Қосим-Жомарт Тўқаев яқинда Коррупцияга қарши курашиш хизматини Миллий хавфсизлик қўмитаси тасарруфига ўтказиш тўғрисида қарор қабул қилган эди.
