Луқпан Аҳмедяров. Видеодан скриншот
Акасини қайтариш учун ёрдам сўраган уральсклик бир аёл қозоғистонлик журналист Луқпан Аҳмедяров устидан полицияга ариза билан мурожаат қилган. Аёлнинг қариндоши Россияга ишлаш учун кетган, бироқ у ерда уни МҲОда қатнашиш учун Мудофаа вазирлиги билан шартнома имзолашга мажбурлашган. Бу ҳақда Аҳмедяров YouTubeдаги «Просто журналистика» каналида маълум қилди.
«8 апрель куни аёл мен билан боғланди. У Россияга пул ишлаш учун кетган ва Россия Мудофаа вазирлиги билан шартнома имзолашга кўндирилаётган акаси ҳақида гапириб берди. 9 куни кечқурун у барча ёзишмаларни ўчириб ташлаган ва гўё бу гапларни айтмаганлиги ҳақида смс ёзган. 10-куни мени ҳибсга олишди, полицияда сўроқ қилишди, 11- куни сўроқ давом этди. 12 апрель куни эса бу аёлнинг ўзи менга қўнғироқ қилиб, менга қарши аризани аслида полиция босими остида ёзганини, уни жиноий жавобгарликка тортиш таҳдиди билан ёзишга мажбурлашганини айтди», — дейди Аҳмедяров.
Журналист аёл билан бўлган суҳбатни видеога ёзиб олган ва ёзувни тақдим этган. Аҳмедяровнинг суҳбатдоши унга нисбатан ҳеч қандай шикояти йўқлигини бир неча бор такрорлаган ва акаси уйга қайтгани учун миннатдорчилик билдирган.
Аёл аризаси юзасидан Қозоғистон Республикаси Жиноят кодексининг 274-моддаси 3-қисми (фуқарога, ташкилотга ёки давлатга катта зарар етказган ёки бошқа оғир оқибатларга олиб келишини била туриб ёлғон маълумотларни тарқатганлик) бўйича тергов ҳаракатлари олиб борилмоқда. Луқпан Аҳмедяров ишда ҳимоя ҳуқуқига эга гувоҳ сифатида иштирок этмоқда.
Жиноий иш Аҳмедяровнинг Facebookда (РФда экстремистик деб тан олинган ва тақиқланган Meta корпорациясига тегишли тармоқ), шунингдек, унинг YouTubeдаги «Просто журналистика» каналида Россияга ишлаш учун олиб кетилган Ғарбий Қозоғистоннинг қарийб 20 нафар фуқароси гўёки Старий Осколдаги гўшт корхонасига ишлаш учун олиб кетилгани ҳақида маълумот пайдо бўлганидан сўнг қўзғатилди. Бироқ, чегарада қозоғистонликларнинг паспортлари олиб қўйилган ва уларга «махсус ҳарбий операцияда қатнашишга оид меҳнат шартномалари» берилган.
Шу билан бирга Қозоғистоннинг Қозондаги бош консуллиги бу маълумотни рад этди. Консулликнинг аниқлик киритишича, гап Уральскдан Россия Федерациясига ишлаш учун кетган 14 нафар республика фуқароси ҳақида кетмоқда. «Улар ҳозирда Россиянинг «Сибирь групп» компаниясида ишлаш учун зарур ҳужжатларни тўлдиришмоқда, шунингдек, тиббий кўрикдан ўтишмоқда. Бу масала дипломатлар назоратида», — дея ишонтирган Бош консуллик.
