Геннадий Головкин. qaz365.kz сайти фотосурати
Шу йилнинг феврал ойида IBF чемпионлик камаридан воз кечган қозоғистонлик профессионал боксчи Геннадий Головкин WВА чемпионлик камаридан ҳам расман воз кечди. Тегишли хат ассоциацияга қозоғистонлик боксчининг адвокати ва GGG Promotions промоутерлик компанияси Жон Хорневер номидан юборилди, деб хабар беради Nur.kz нашри.
«WВА директиваси остида WBA Regular чемпиони Эрисланди Лара билан жанг қилиш ҳуқуқи учун тендер муддати яқинлашаётганини ҳисобга олиб, Геннадий жараённинг чўзилишини истамади. Шу муносабат билан, Головкин WВА суперўрта вазн тоифасидаги чемпионлик унвонидан воз кечаётганини маълум қиламиз», — дейилади мактубда.
Хатда рад этиш сабаблари кўрсатилмаган, аммо тахмин қилиш мумкинки, IBF камаридан воз кечишда қозоғистонликнинг DAZN стриминг хизмати билан фойдали шартномаси айбдор. Головкин DAZN босими туфайли IBF чемпиони унвонидан воз кечгач, WВА камарини ҳимоя қилишда ҳам худди шундай вазият юзага келиши мумкинлигини айтганида, бу версияни Хорневер билвосита тасдиқлади.
Геннадий Головкин икки титулдан воз кечганига қарамай, бокс оламидаги энг муҳим бешинчи мақомга эга бўлган IBO чемпиони бўлиб қолаверади.
Шу билан бирга, Boxingnews24.com мухбири Крейг Дэли 40 ёшли Головкин Ларадан қочиш учун WВА чемпионлик унвонидан воз кечишини тахмин қилди, чунки қозоғистонликнинг «сўнгги бешта жангида даҳшатли кўриниш олганди».
Геннадий Головкин (45 жанг, 42 ғалаба, 1 дуранг, 2 мағлубият) IBO йўналиши бўйича ўрта вазн тоифасида амалдаги чемпион, расмий равишда 10 март ҳолатига кўра WВА чемпиони ҳисобланади. Собиқ WВC жаҳон чемпиони (2016-2018), IBF (2015-2018, 2019-2023), The Ring (2018) саналади. Головкин Олимпия ўйинлари кумуш медали (2004), Жаҳон ва Осиё чемпионатлари совриндоридир.
