Қосим-Жомарт Тўқаев. Қозоғистон президенти матбуот хизмати фотосурати
Қозоғистон президенти Қосим-Жомарт Тўқаев Савдо ва интеграция вазири Бахит Султонов ва Қишлоқ хўжалиги вазирлиги раҳбари Ербол Карашукеевнинг ишини танқид қилди. 14 июль куни бўлиб ўтган ҳукуматнинг кенгайтирилган йиғилишида у юқори нархлар ва ишлаб чиқариш сустлиги учун уларга танбеҳ берди.
Жумладан, Тўқаев Қозоғистоннинг импорт қилинадиган уруғ ва шакарга жуда боғлиқлигига эътибор қаратди.
«Муқаддам ишга туширилган еттита шакар заводидан бугунги кунда фақат тўрттаси ишлаб турибди, уларнинг атиги учдан бир қисми (31%) юкланган. Қишлоқ хўжалиги вазирлиги 2026 йилга келиб лавлаги қанд улушини олти баробарга (7 фоиздан 43 фоизга) оширишни режалаштирмоқда. Бироқ сўнгги тўрт йил ичида қанд лавлаги майдони учдан бир қисмга камайди», — деди президент.
Шунингдек, у Қозоғистоннинг 90% импорт шакарга қарамлигини ва бу ҳукуматнинг жиддий хатоси эканлигини таъкидлади. Тўқаев ҳукуматга зудлик билан шакар саноатини ривожлантириш бўйича алоҳида тармоқ лойиҳасини ишлаб чиқиш бўйича топшириқ берди.
«Ўсимликчилик ҳосилдорлиги жаҳондагидан сезиларли даражада орқада. Ўз уруғлари билан таъминланиш атиги 51 фоизни ташкил этади. Картошка ва қанд лавлаги каби маҳсулотлар учун бу кўрсаткич 10% дан ошмайди. Биз хориждан олиб келинган уруғларга қаттиқ боғланиб қолганмиз. Ҳукумат тажриба хўжаликлари асосида бирламчи уруғчиликни ривожлантириши керак», — дея қўшимча қилди Тўқаев.
Умуман олганда, президент мамлакатнинг амалдаги ҳукумати ишини «ўртача» деб баҳолади.
Тўқаев кузда ҳукумат таркибида ўзгаришлар бўлиши мумкинлигини истисно этмади.
«Ҳукумат зудлик жавоб берадиган тезкор штаб эмас, балки реал ислоҳотларни таклиф этувчи ва амалга оширувчи асосий давлат институти бўлиши керак. Қозоғистонда иқтисодчи ва тадбиркорлар кўп. Олий маълумотли ва истеъдодли. Лекин айтиш мумкинки, уларда аниқ таклифлар бор бўлса ҳам оз. Кузга келиб, эҳтимол, кадрлар бўйича қарорлар қабул қилишга тўғри келар. Турган гап, бу инқироз юзага келган тақдирда жуда зарур бўлади», — деди Токаев.
Ўша йиғилишда Президент Экология, геология ва табиий ресурслар вазири Сериккали Брекешевга 80 минг бош сайғоқни популяциядан олиб қолиш қарори учун танбеҳ берди.
