Елена Рибакина. championat.com сайти фотосурати
Қозоғистонлик теннисчи Елена Рибакина фаолиятида илк бор WTA жаҳон рейтингида биринчи ўринни эгаллашини кафолатлади. У расман US Open (АҚШ Очиқ чемпионати) якунланганидан сўнг, 14 сентябрь куни рейтингда биринчи ўринга кўтарилади.
Рибакина US Openнинг ярим финалига чиқиши орқали биринчи ўринни ўзиники қилди. 1/4 финалда 27 ёшли спортчи хитойлик Чжэн Циньвэнни 3:6, 6:1, 6:4 ҳисобида мағлуб этди. Ҳал қилувчи сетда Қозоғистон вакили 3:4 ҳисобида ортда бораётган эди, аммо кетма-кет учта геймда ғалаба қозонди. Финалга чиқиш учун Рибакина америкалик Коко Гауфф билан баҳс олиб боради.
Турнирдаги кейинги натижаларидан қатъи назар, Рибакина WTA рейтингидаги навбатдаги рўйхатда Арина Соболенкодан ўзиб кетади. У рейтингнинг биринчи поғонасига кўтарилган тарихдаги 30-теннисчи, шунингдек, Қозоғистон тарихида аёллар ва эркаклар ўртасида жаҳон тенниси рейтингини бошқарган биринчи вакил бўлади.
Тарихий ютуғи муносабати билан Рибакнинани Қозоғистон президенти Қосим-Жомарт Тўқаев табриклади.
«WTA рейтингида биринчи ўринга чиқиш — феноменал истеъдод, улкан меҳнат ва ўзингизга бўлган мустаҳкам ишонч туфайли забт этилган спорт чўққисидир», — дейилади давлат раҳбари табригида.
Тўқаев Рибакина Қозоғистон спортини дунёга танитгани ва жаҳон тенниси тарихидан ўз номини муносиб жой олганини таъкидлади. Президент, шунингдек, унинг спортдаги йўлини ёш спортчилар учун намуна деб атади ҳамда теннисчининг кортда ҳам, унинг ташқарисида ҳам ўзини тутиш маданиятини алоҳида қайд этди. У Рибакинага чемпионлик руҳини сақлаб қолиш ва янги муваффақиятларга эришишни тилади.
Қайд этиш лозим, август ойида Рибакина жаҳон рейтингида биринчи ўринни эгаллашга аллақачон яқин келган эди. Цинциннатидаги WTA 1000 турнирида Арина Соболенко мағлуб бўлганидан сўнг, Рибакинага рейтингда биринчи ўринга чиқиш учун финалга етиб боришнинг ўзи кифоя эди. Бироқ, Ига Швёнтекка қарши чорак финал баҳсида қозоғистонлик теннисчи чап тўпиғидан олган жароҳати сабаб биринчи сетда 1:4 ҳисобида ўйинни давом эттиришдан бош тортди ва бу имкониятни бой берди.
Елена Рибакина Россия терма жамоаси таркибида 18 ёшгача бўлган ўсмирлар ўртасидаги Европа жамоавий чемпионатида ғолиб бўлган, шунингдек, WTA турида яккалик баҳсларида битта турнирда чемпионликни қўлга киритган. 2018 йил июнь ойида спортчи Қозоғистон номидан иштирок этишга қарор қилди. 2021 йилда Франция Очиқ чемпионатида чорак финалгача етиб борган. 2022 йилда Уимблдон турнирида ғолиб бўлган. 2023 йилда Қозоғистоннинг жаҳоннинг энг кучли уч теннисчиси қаторига кирган биринчи вакилига айланди. 2026 йил январь ойида эса Australian Open чемпионлиги унвонини қўлга киритди. Жорий US Open турнирида ярим финалга чиқиши теннисчининг Нью-Йоркдаги мусобақадаги энг яхши натижаси бўлди.
