Озодликка чиққан Асқат Жетиген. 24.kg сайти фотосурати
Қирғизистонда танилган оқин Асқат Жетиген 19 август куни умумий режимдаги колонияда уч йиллик жазосини ўтаб, озодликка чиқди. Бу ҳақда 24.kg хабар берди.
Адвокат ва оқиннинг яқинлари Жетигенни колония дарвозаси олдида кутишган, аммо оқин уларга пешвоз чиқмаган. Ҳуқуқ ҳимоячиси Гулшайир Абдирасулованинг сўзларига кўра, тонг саҳарда колония бошлиғи Жетигенни ўз машинасида олиб чиқиб, катта Чуй канали (КЧК) ҳудудида қолдириб кетган. Уни шу ерда адвокат топган.
«Колонияда мени матбуот кутаётганини билишарди. Афтидан, улар қандайдир резонанс ва турли фикрлар пайдо бўлишидан хавотирланган», — деди Жетиген унинг КЧКга олиб борилиши сабабини изоҳлар экан.
Оқин 2024 йил март ойида, мамлакат президенти Садир Жапаровни ҳақоратомуз сўзлар билан танқид қилган видео эълон қилинганидан сўнг ҳибсга олинган эди. Жетигенга нисбатан Қирғизистон Жиноят кодексининг 278-моддаси («Ҳокимият вакилларининг қонуний талабларига фаол бўйсунмасликка ва оммавий тартибсизликларга чақириқлар, шунингдек фуқароларга нисбатан зўравонликка чақириқлар») ҳамда 327-моддаси («Ҳокимиятни зўравонлик йўли билан эгаллашга чақириқлар») бўйича иш қўзғатилган. Суд оқинни 278-модда бўйича оқлаган, 327-модда бўйича айбдор деб топган ва унга уч йил озодликдан маҳрум қилиш жазосини тайинлаган.
Жетиген ўз айбини тан олмаган. Якуний сўзида у ижтимоий тармоқлардаги ноўрин ҳаракатлари учун халқдан кечирим сўраган ва видеолари Жиноят кодекси доирасига кирмаслигини, энг кўпи билан маъмурий жаримага лойиқ эканини таъкидлаган. Оқиннинг айтишича, уни ҳибсга олгандан кейин Бишкекдаги Миллий хавфсизлик давлат қўмитаси (МХДҚ) бўлимида бир соат давомида ток билан азоблашган. Кейинроқ изоҳ хатида Жетиген ўзига нисбатан азоб-уқубат қўлланмаганини ва соғлиғи ҳамда хавфсизлигига ҳеч қандай таҳдид йўқлигини ёзган.
Колонияда бўлган пайтида оқин маҳкумларга нисбатан инсон қадрини камситувчи муносабат, жисмоний зўравонлик қўлланилиши, тикувчиликда ишловчи ходимларга иш ҳақи тўланмаслиги, шунингдек, соғлиғи ёмонлашгани ва тиббий ёрдам кўрсатиш рад этилганидан шикоят қилган. Жазони ижро этиш маҳкамаси бу айбловларни рад этган.
Озодликка чиққанидан сўнг Жетиген журналистларга шахсан ўзига нисбатан азоблаш қўлланилмаганини, аммо бундай ҳолатлар бошқа маҳкумларга нисбатан бўлганини айтган. У қўл қовуштириб ўтиролмаганини ва бу ҳақда мактубларида ёзганини қўшимча қилган, чунки «бу халққа етиб бориши керак эди».
