Жорий йил январь–июнь ойларида Россияга 7,1 миллион хорижлик ташриф буюрган. Бу 2025 йилнинг шу даврига нисбатан (7,8 миллион ташриф) камроқ кўрсаткичдир. Мамлакатлар орасида одамлар сони бўйича биринчи ўринни Ўзбекистон сақлаб қолган, Тожикистон эса Хитойга ўрнини бой бериб, топ-3 дан чиқиб кетган. Бу ҳақда Россия Федерал хавфсизлик хизмати Чегара хизмати маълумотларига таянган ҳолда «Коммерсантъ» нашри материалларида сўз юритилади.
Агар ўтган йилнинг биринчи ярмида етакчи учликни фақат Марказий Осиё давлатлари ташкил этган бўлса, ҳозирги рўйхатда минтақа вакилларидан фақат иккитаси қолган.
Рўйхат етакчиси бўлган Ўзбекистон фуқаролари ҳисобот даврида Россияга 1,6 миллиондан ортиқ марта кириб борган. Бир йил олдин бу кўрсаткич янада юқори бўлиб, 1,8 миллиондан ортиқни ташкил этган эди.
Иккинчи ўринни Қозоғистон эгаллаган. 2026 йилнинг дастлабки икки чорагида Россияга ушбу мамлакатдан қарийб 1,4 миллион нафар фуқаро келган. Бу ҳам ўтган йил январь–июнь ойларида қайд этилган кўрсаткичдан кам бўлиб, ўша пайтда 1,5 миллиондан ортиқни ташкил этганди.
Учинчи ўринни эгаллаган Хитой йиллик кўрсаткичини оширган ягона давлат бўлди. Хитой фуқароларининг Россияга ташрифлари сони 876 мингдан ошган, ҳолбуки 2025 йилнинг биринчи ярмида хитойликларнинг Россияга кириши бўйича 767 мингта белги қайд этилган эди.
Тожикистон фуқароларининг Россияга қилган сафарлари сони эса 693 мингта кўрсаткичда тўхтаган.
Қирғизистон бешинчи ўринда қолган ва минтақа қўшнилари каби сафарлар сони камайиши тенденциясига қўшилган. Жорий йилда республикадан Россияга ташрифлар сони 442 мингтани ташкил этган, ўтган йил январь–июнь ойларида эса бу кўрсаткич 515 мингта бўлган эди.
Туркманистон Россияга қилинган сафарлар сони бўйича ҳатто топ-10 таликка ҳам кира олмаган. У, масалан, Туркия ва Мўғулистон каби давлатлардан ортда қолган.
«Коммерсантъ» маълумотларига кўра, 2026 йилнинг биринчи ярмида хорижликлар Россияга кириш чоғида 2,4 миллион ҳолатда сафар мақсади сифатида ишлашни кўрсатган. Ушбу тоифада Марказий Осиё республикалари етакчилик қилмоқда:
✅ Ўзбекистон — 1,1 миллион сафар;
✅ Тожикистон — 494 минг сафар;
✅ Қирғизистон — 289 минг сафар.
Бироқ, бу ҳолатда ҳам кўрсаткич 15 фоизга камайгани кузатилмоқда. Ўтган йилнинг дастлабки олти ойида Россияга ишлаш учун келган учта етакчи давлат фуқаролари сони 2,3 миллионтага етган бўлса, ҳозир бу кўрсаткич 1,9 миллионни ташкил этмоқда.
Ҳисобот даврида Россияга сайёҳ сифатида 676 мингдан ортиқ хорижлик ташриф буюрган. Бу йўналишда Хитой катта фарқ билан етакчилик қилмоқда — 380,5 минг ташриф. Кейинги ўринларда Туркманистон, Туркия ва Саудия Арабистони, уларнинг умумий кўрсаткичи салкам 100 мингдан ошган.
Яна 202 мингта ташриф ўқиш мақсади билан амалга оширилган. Давлатлар кесимидаги топ-3 таликка Қозоғистон, Хитой ва Ўзбекистон киради.
Ниҳоят, 2,3 миллион ҳолатда хорижлик меҳмонлар ташриф мақсадини хусусий сафар сифатида кўрсатган. Бундай сабабни энг кўп Қозоғистон фуқаролари қайд этган — 850 минг марта. Кейинги ўриндаги Ўзбекистон ва Абхазия улардан анча ортда қолган — тегишли равишда 263 минг ва 225 мингта ташриф.
Бир неча йилдан бери Россия мамлакатда хорижликларга нисбатан қоидаларини кучайтириб келмоқда. Жумладан, назоратдаги шахслар реестри жорий этилди, мигрантларга ўз геолокация маълумотларини давлат органларига тақдим этиш мажбурияти юкланди, депортация қилиш учун асослар сони кўпаймоқда ва ҳоказо.
Шу муносабат билан Россияда бўлиб турган хорижий фуқаролар сони камаймоқда. Масалан, 2026 йил май ойи ҳолатига кўра, Россияда 6,1 миллион нафар хорижлик бўлган, бир йил олдин эса бу кўрсаткич 6,8 миллионни ташкил этган. Камайиш тахминан 10,3 фоизга тенг бўлган.
