Мавлян Аскарбеков. Қирғизистон МСК сайти фотосурати
Бишкек шаҳри Ленин туман суди 29 сентябрь куни фаол Мавлян Аскарбековни умумий режимдаги колонияда икки йил муддатга озодликдан маҳрум қилиш жазосига ҳукм қилди. Бу ҳақда Kaktus.media хабар берди.
Аскарбеков республика Жиноят кодексининг 330-моддаси — «Ирқий, этник, миллий, диний, миллатлараро адоват (низо) қўзғатиш» бўйича айбдор деб топилди. Ҳукм ўқиб эшиттирилаётганда судя Аскарбековнинг қамоқда ўтказган вақтини ҳисобга олиб, «бир кун икки кунга тенг» тамойилини қўллади. Суд музокаралари давомида давлат айбловчиси янада қаттиқроқ жазо — тўрт йиллик қамоқ жазосини сўраган эди.
Фаол июнь ойида Миллий хавфсизлик давлат қўмитаси (МХДҚ) ходимлари томонидан қўлга олинган. 13 июнь куни суд унга нисбатан қамоққа олиш тарзидаги эҳтиёт чорасини танлаб, уни МХДҚ тергов ҳибсхонасига юборган.
Қўлга олинишидан олдин Аскарбеков ўзининг ижтимоий тармоқлардаги саҳифасида унга қарши провокацион материаллар тарқатилаётганини, унинг ўзини эса «халқ душмани» қилиб кўрсатишга уринишлар бўлаётганини ёзган. Шунингдек, у аввалроқ Вазирлар Маҳкамаси раисига Қирғизистонда кичик ва ўрта бизнес соҳасида Хитой фуқаролари иштирокининг кўлами ҳақида сўров юборгани ва бу мавзу бўйича тўғридан-тўғри эфирда очиқ дебатлар ташкил этишни таклиф қилганини маълум қилган.
Аскарбековнинг сўзларига кўра, 7 июнь куни унинг уйига МХДҚнинг уч нафар ходими келган. Унинг таъкидлашича, суҳбат давомида яширин видеотасвирга олиш амалга оширилган, кейин эса ёзувлар уни обрўсизлантириш мақсадида монтаж қилиниб, оммага тарқатилган. Бу воқеалардан аввалроқ ҳам ижтимоий тармоқларда фаолни обрўсизлантирувчи видеолар пайдо бўлган.
Судда Аскарбековнинг ҳимояси унинг баёнотлари миллатлараро адоват қўзғатишга қаратилмаганини таъкидлаган. Фаолнинг ўзи эса ҳукм чиқариш учун асослардан бири бўлган лингвистик экспертиза натижаларини тан олмаган.
Мавлян Аскарбеков 47 ёшда. У мамлакатдаги воқеаларга мунтазам равишда изоҳ бериб келадиган ва ҳукуматнинг айрим ҳаракатларини бир неча бор танқид қилган сиёсатчи сифатида танилган. Илгари у бир неча марта парламент сайловларида номзод сифатида иштирок этган. Бундан олдин эса бир неча йил давомида Бишкек шаҳри Первомайский тумани ҳокими ўринбосари лавозимида ишлаган.
