Крейг ва Линдси Форман. Reuters агентлиги сайтида чоп этилган ижтимоий тармоқдаги фотосурат
Ўтган йили Эронда жосуслик айбловлари билан 10 йилга озодликдан маҳрум қилинган Британия фуқаролари Крейг ва Линдси Форман апелляция судида ютқазишди. Бундан ташқари, жуфтликка суд мажлисида қатнашишга рухсат берилмаган ва уларга суд жараёни ҳақида батафсил маълумот тақдим этилмаган, деб хабар беради Reuters маҳбусларнинг қариндошларига таяниб.
Линдси Форманнинг ўғли Жо Беннетнинг сўзларига кўра, апелляция суди судланувчилар хабарисиз ўтказилган. Бундан ташқари, британиялик жуфтлик иш ҳужжатларини ўзлари тушунмайдиган форс тилида имзолашга мажбур бўлган.
Беннетнинг сўзларига кўра, жиноят иши энди Эрон Олий судига ўтказилган, аммо суд жараёни қачон бошланиши номаълум. Маҳбуснинг ўғли эр-хотин панжара ортида бўлганида ҳуқуқий ёрдамсиз қолганини таъкидлайди.
Норозилик сифатида Крейг ва Линдси очлик эълон қилишган.
Британия Ташқи ишлар вазирлиги ўз навбатида апелляция суди қароридан норози эканини билдиради. Дипломатия маҳкамаси эр-хотиннинг ўз ватанига хавфсиз қайтишини таъминлаш учун иш олиб боришда давом этади.
ℹ️ Форманлар оиласи 2025 йил 3 январда Эронда дунё бўйлаб мотоциклда саёҳат қилиш пайтида ҳибсга олинган. Ислом Республикаси расмийлари европаликларни «маълумот тўплашда» айблаган.
Британиялик жуфтлик жосусликка алоқадорлигини рад этган ва судда айбдорликларини тасдиқловчи ҳеч қандай далил тақдим этилмаганини таъкидлаган. Шунга қарамай, ўтган йил октябрь ойида жуфтлик 10 йилга озодликдан маҳрум қилинган.
Расмий Лондон ҳукмни асоссиз деб атаган ва фуқароларининг озод қилинишини талаб қилишларини айтган. Судланган жуфтликнинг оиласи Эрон Яқин Шарқдаги давом этаётган можаролар пайтида Форманлардан «жонли қалқон» сифатида фойдаланаётганига ишонади. Шу билан бирга, маҳбусларнинг қариндошлари Британия ҳукуматига қарши чиқишган, уларнинг фикрича, у судланган жуфтлик ҳуқуқларини ҳимоя қилиш учун етарли иш қилмаяпти.
