Оренбург газни қайта ишлаш заводи. pererabotka.gazprom.ru сайти фотосурати
Оренбург газни қайта ишлаш заводи (Россияда жойлашган) учувчисиз учиш аппарати ҳужумидан сўнг Қозоғистоннинг йирик Қорачиғаноқ конидан қайта ишлаш учун газ қабул қилишни тўхтатди. Тегишли хабар Қозоғистон Энергетика вазирлигининг Телеграм-каналида 19 октабр куни эълон қилинди.
«Россия томонидан етказилган зарар моҳияти ва завод фаолиятини тиклаш муддатлари ҳақида маълумот ҳозирча тақдим этилмади, — дейилади хабарда.
Вазирлик Қозоғистонда истеъмолчиларга газ етказиб беришда узилишлар кузатилмаганини таъкидлади. Қозоғистон Энергетика вазирлиги вакиллари Россия томони ва кон операторлари билан ҳамкорликда вазиятни кузатиб бормоқда.
Россиядаги энг йирик табиий газни қайта ишлаш заводига дрон ҳужуми 19 октябрь куни эрталаб хабар қилинди. Оренбург вилояти губернатори Евгений Солнцевнинг сўзларига кўра, завод инфратузилмаси қисман шикастланган; дрон зарбасидан сўнг, «цехлардан бирида ёнғин чиққан». Талофат оқибатларини бартараф этиш учун барча фавқулодда хизматлар сафарбар этилган. Расмий маълумотларга кўра, қурбонлар йўқ.
Ғарбий Қозоғистондаги Қорачиғаноқ нефть ва газ конденсат кони 280 квадрат километрдан ортиқ майдонни эгаллайди ва дунёдаги энг йирик конларидан бири ҳисобланади. У ерда ишлаб чиқарилган нефтнинг катта қисми Каспий қувурлари консорциуми орқали экспорт қилинади. Ишлаб чиқарилган газга келсак, шартномага кўра, Қорачиғаноқ оператори газ ҳажмининг камида 40 фоизини қайта қуйиш мажбуриятини олади. Бу ишлаб чиқариш даражасини сақлаб қолиш ва коннинг самарали ишлаши учун зарур ҳисобланади.
Қолган ҳажм Россияга, Оренбург газни қайта ишлаш заводига юборилади, чунки коннинг ўзига хос қайта ишлаш қуввати йўқ. Россиянинг «Газпром» ва «КазМунайГаз» компаниялари ўртасидаги «Казросгаз» қўшма корхонаси айнан шу мақсадда яратилган. Компания Қорачиғаноқдан Оренбург газни қайта ишлаш заводига суюлтирилган газ ишлаб чиқариш учун хом ашё етказиб беради, шундан сўнг ёқилғи ваколатли савдогарлар орқали экспорт қилинади, товар газининг бир қисми республикага қайтарилади.
Амалдаги келишувларга кўра, Қорачиғаноқ 2038 йилгача Оренбург газни қайта ишлаш заводига йилига 9 миллиард куб метргача газ етказиб бериши мумкин.
