Шавкат Мирзиёев ва Си Цзиньпин. Ўзбекистон президенти матбуот хизмати фотосурати
Ўзбекистон ва Хитой инновацион лойиҳаларни илгари суриш ва мутахассислар тайёрлашга ёрдам берадиган сунъий интеллектни ривожлантириш бўйича қўшма марказ яратиш ғоясини кўриб чиқмоқда. Ташаббус икки давлат раҳбарлари – Шавкат Мирзиёев ва Си Цзиньпиннинг 2 сентябрь куни Пекинда бўлиб ўтган учрашувида муҳокама қилинди, деб хабар беради Ўзбекистон раҳбари матбуот хизмати.
Томонлар илмий ва таълим соҳасидаги ҳамкорликка алоҳида эътибор қаратдилар. Ўзбекистонда Шимоли-ғарбий қишлоқ ва ўрмон университетининг филиали ҳамда Халқаро математика маркази очилди. Сиань нефть университети филиалини очиш тўғрисида Битим имзоланди. Пекин технология институти филиалини очиш режалаштирилган.
Шу билан бирга, Ўзбекистон маҳаллий талабалар учун хитой тилини ўрганиш имкониятларини кенгайтиришни қўллаб-қувватлайди, Конфуций институтлари фаолияти фаол ривожланмоқда. Энергетика, машинасозлик, сунъий интеллект, тиббиёт ва қишлоқ хўжалиги каби соҳалар бўйича мутахассислар тайёрлаш учун мамлакат ҳудудларида «Лу Бань устахоналари» ташкил этиш режалаштирилган.
Сайёҳлар алмашинуви ўсиши учун шароит яратиш мақсадида авиақатновлар сони оширилмоқда, икки мамлакат ўртасида визасиз тартиб жорий этилди.
Шу кунларда Хитой Миллий музейидаги катта кўргазмада Ўзбекистон ҳам қатнашмоқда. 2027 йилда Шанхай ва Пекинда санъат кўргазмаларини ўтказиш режалаштирилган.
Учрашувда савдо-иқтисодий ҳамкорлик борасидаги ютуқлар қайд этилди. Ўтган йили Ўзбекистон ва Хитой ўртасидаги товар айирбошлаш ҳажми 14 миллиард доллардан ошди, жорий йил бошидан буён бу кўрсаткич 23 фоизга ўсди. Эндиликда саноат ва қишлоқ хўжалиги маҳсулотлари етказиб беришни кўпайтириш ҳисобига ўзаро товар айирбошлаш ҳажмини 20 миллиард долларга етказиш вазифаси қўйилган.
Инвестицион лойиҳалар портфели 60 миллиард доллардан ошади. Шундай қилиб, биргина 2024 йилнинг ўзида қиймати 10 миллиард доллардан ортиқ бўлган 64 та лойиҳа ишга туширилди. Ўзбекистон ҳудудларида қўшма технопарклар ва саноат зоналари фаолият кўрсатмоқда, маҳаллийлаштириш даражаси ошиши билан BYD автомобилларини ишлаб чиқариш кенгаймоқда.
Мирзиёевнинг Хитойга ташрифи арафасида бизнес-форум бўлиб ўтди, унда икки мамлакат ишбилармон доиралари «яшил» энергетика, жамоат транспортини модернизация қилиш ва рақамлаштириш, пуллик йўллар қуриш, муҳим фойдали қазилмаларни қайта ишлаш ва бошқа соҳалардаги ташаббусларни муҳокама қилди.
Эксимбанк, Хитой давлат тараққиёт банки, «Ипак йўли» жамғармаси ва бошқа институтлар билан кенг кўламли шериклик кенгаймоқда. Эксимбанк кўмагида яқинда Тошкентда Олимпия шаҳарчаси қуриб битказилди. Томондар Хитой – Қирғизистон – Ўзбекистон стратегик темир йўли қурилишининг амалий босқичи бошлангани мамнуният билан қайд этдилар.
Бундан ташқари, Хитой тажрибаси асосида Марказий Осиё республикасида камбағалликка барҳам беришга қаратилган чора-тадбирларни амалга ошириш бўйича эксперт кенгаши ташкил этилади.
Мирзиёев ва Си Цзиньпин ўртасидаги музокаралар якунлари бўйича қуйидагилар имзоланди:
✅ «Ўзбекистон – 2030» стратегияси ва «Бир макон, бир йўл» ташаббусини ўзаро боғлаш бўйича ҳамкорлик дастури;
✅ Маданият марказларини ўзаро таъсис этиш тўғрисида битим;
✅ Тиббий хизматлар соҳасида ҳамкорлик тўғрисида битим.
Бундан ташқари, ташриф доирасида қуйидаги келишувлар ҳам имзоланди:
👉 Ўзбекистонга земснарядлар (техник кема) бериш лойиҳасининг иккинчи босқичини лойиҳалаштириш бўйича;
👉 Ўзбекистондан Хитойга қовун ва бодом экспорт қилишда фитосанитария талаблари тўғрисида;
👉 космик фанлар, технологиялар ва космик фаолият натижаларидан тинчлик мақсадларида фойдаланишда ҳамкорлик қилиш тўғрисида;
👉 Самарқанд вилояти ва Тяньцзинь шаҳри ўртасида шериклик муносабатларини ўрнатиш тўғрисида;
👉 Ўзбекистон Савдо-саноат палатаси ва Хитой Халқаро савдога кўмаклашиш кенгаши ўртасидаги ҳамкорлик тўғрисида.
