kaktus.media сайти фотосурати
11 февраль куни кечқурун Бишкек Кардиожарроҳлик ва органларни трансплантация қилиш илмий-тадқиқот институтида содир бўлган ёнғин натижасида 16 ва 1,7 ёшли икки бемор ҳалок бўлди. Яна тўққиз киши ис газидан заҳарланиш ташхиси билан касалхонага ётқизилди, деб ёзади Kaktus.media Қирғизистон Соғлиқни сақлаш вазирлигига таяниб.
Республика Фавқулодда вазиятлар вазирлиги маълумотларига кўра, илмий-тадқиқот институтида содир бўлган ёнғинга оид маълумот тахминан соат 21:00 ларда келиб тушган. Тез орада ўт ўчирувчилар воқеа жойига етиб кела бошлаган. Қутқарувчилар 260 кишини эвакуация қилган, беморлар пойтахтдаги бошқа ихтисослаштирилган тиббиёт муассасаларига юборилган.
Соат 22:33да ёнғин жиловланган, соат 23:15да эса тўлиқ ўчирилди, деб хабар қилади Фавқулодда вазиятлар вазирлиги.
Аммо икки беморни қутқаришнинг имкони бўлмаган. Операциялардан сўнг болалар ўпканинг сунъий шамоллатиш мосламаларига уланган бўлган. Эвакуация вақтида вентиляторларни ўчиришга тўғри келган ва беморлар мустақил нафас ололмаган. Улар зудлик билан Миллий кардиология ва терапия марказига етказилган, бироқ шифокорларнинг уринишларига қарамай, иккала бола вафот этган.
Соғлиқни сақлаш вазирлигининг аниқлик киритишича, ис газидан заҳарланиш ташхиси билан жароҳатланганлар орасида тиббиёт муассасасининг етти нафар ходими ва икки нафар беморга қаровчи бўлган. Айни пайтда уларга керакли ёрдам кўрсатилмоқда.
Бошқарма маълумотларига кўра, воқеа содир бўлган вақтда илмий-тадқиқот институтида 104 киши бўлган: 50 нафар бемор, жумладан, 19 нафар бола, 22 нафар ходим ва 32 нафар беморга қаровчи. Қайд этилишича, 11 нафар бемор Миллий кардиология марказининг реанимация бўлимига ётқизилган, улардан икки нафарининг аҳволи ўта оғир деб баҳоланмоқда.
Қирғизистон Бош вазири Адилбек Қосималиев мазкур ёнғин билан боғлиқ вазиятни алоҳида назоратга олган. Ёнғин сабабларини аниқлаш ва барча мутасадди давлат органлари ҳаракатларини мувофиқлаштириш бўйича идоралараро комиссия тузилган.
Шунингдек, Бишкекнинг Первомайский туман ички ишлар бошқармаси фавқулодда ҳолат бўйича «Ёнғин хавфсизлиги қоидаларини бузиш» моддаси бўйича жиноий иш қўзғатгани маълум. Тегишли экспертиза тайинланган.
