Сўнгги уч йилда кимё ўқитувчиси Моҳира Болтаева олимпиадада муваффақиятли иштирокчиларни тайёрлагани учун жами қарийб 1 миллиард сўм (78 минг доллар) олган. Бу ҳақда «Нигоҳ» Telegram-канали хабар берди.
Моҳира Болтаева 23 ёшда, Тошкент шаҳрида жойлашган Абу Али ибн Сино номидаги ихтисослаштирилган мактабда ишлайди. Ўзбекистон мактабгача ва мактаб таълими вазири Хилола Умарованинг Телеграмъдаги каналида эълон қилган мотивацион видеода қиз 2019 йили кимё бўйича халқаро олимпиадада кумуш медални қўлга киритганини айтади. Ҳозирда у ўз услубларидан фойдаланган ҳолда иқтидорли мактаб ўқувчиларини олимпиадаларга тайёрламоқда.
«Бу йили ўз шахсий рекордимни ўрнатдим – уч нафар шогирдим халқаро кимё олимпиадасида медал соҳиби бўлди», – дейди Болтаева. Унинг ҳисобида вилоят олимпиадаларидаги шогирдларининг яна бешта ғалабаси ҳам бор.
Олимпиада ғолиблари ва уларнинг ўқитувчиларини тақдирлаш маросимида Болтаева энг кўп мукофот пули – 378 миллион сўм (29 минг доллар) олди. 2023 йили 350 миллион, 2022 йили 250 миллион сўм мукофот пули билан тақдирланган.
Жами 2024 йили ўзбекистонлик мактаб ўқувчилари халқаро ва минтақавий олимпиадаларда 122 та медални қўлга киритишди, бу Ҳилола Умарованинг таъкидлашича, тарихий рекорддир. Ҳукумат ғолиблар ва уларнинг ўқитувчиларига мукофот пули учун 9 миллиард сўм (700 минг доллар) ажратган.
Хусусан, нуфузли халқаро олимпиадалардаги ғолиблик учун:
🥇олтин медал соҳибига 187,5 миллион сўм (14,5 минг доллар), ўқитувчига 168,75 миллион сўм (13 минг доллар);
🥈кумуш медал соҳибига – 112,5 миллион сўм (8,7 минг доллар), ўқитувчига – 93,75 миллион сўм (7,3 минг доллар);
🥉бронза медали совриндорига – 75 миллион сўм (5,8 минг доллар), ўқитувчига 56,25 миллион сўм (4,4 минг доллар) пул мукофоти берилади.
Шунингдек, бундай медаллар соҳиблари олий таълим муассасаларига давлат гранти асосида ўқишга қабул қилинади ва уларнинг ўқитувчилари кейинги ўқув йили давомида иш ҳақига 200 фоиз устама пули олади, уларга олий малака тоифаси берилади. Агар нуфузли халқаро олимпиада ғолиблари таълим муассасаларида ғолиб бўлган фанидан дарс берса, уларнинг ойлик маошига 150 фоиз устама берилади.
