freepik.com сайти фотосурати
Қозоғистонда InDrive ва «Яндекс.Такси» хизматлари ҳайдовчилари учун 50 километрдан ортиқ масофани босиб ўтиш учун чеклов жорий этиш режалаштирилмоқда. Бу ҳақда ҳукумат йиғилишида Транспорт вазири Марат Карабаев маълум қилди, деб ёзади Zakon.kz.
Вазирнинг аниқлик киритишича, рақамли технологиялар автобусларда одамларни ташиш оммабоплигини пасайтирган, чунки ҳозирда уйда туриб машинага буюртма бериш осонроқ.
«Биз икки ҳолатни кўриб чиқяпмиз. Биринчиси — ўртача тезликни белгилайдиган нормани жорий этиш. Бу мунтазам автобус хизматлари балансига таъсир қилади. Чунки ҳозирда одамлар ҳайдовчилар тезлик чегарасидан оширган ҳолда тезроқ елтиб борадиган InDriveни афзал кўришади. Бизда «ўртача тезлик» ўрнатилгандан сўнг, автобус ва енгил автомобил ўртасида фарқ кам бўлади.
Иккинчидан, ушбу турдаги агрегаторлар 50 км гача ташиш ҳуқуқига эга бўлган мамлакатлар тажрибаси мавжуд. Қолган ҳаммаси оддий автобус хизматларига ўтиши керак. Яъни, InDrive ва бошқа агрегаторлар 50 км дан ортиқ масофага йўловчиларни таший олмайди», — деди Марат Карабаев.
«Ўртача тезлик»га келсак, вазирнинг сўзларига кўра, у видеокамералар ёрдамида ҳисоблаб чиқилади. «Бу А нуқтага кириб, Б нуқтасидан чиқиб кетилаётганда камера ўртача тезликни ҳисоблаб чиқади. Агар умумий тезлик юқорироқ бўлган бўлса, унда жарима солинади», — дея вазир ҳукумат йўловчилар хавфсизлиги устидан қайғураётганига урғу берди.
InformBURO.kz хабар беришича, inDrive матбуот хизмати аллақачон бу таклифга жавоб бериб, улар Қозоғистон бозорида 10 йилдан бери ишлаб келаётгани ва назорат қилувчи органлар талабларига қатъий риоя қилишини таъкидлаган. «Бугунги кунда inDrive мамлакатда саёҳатчиларни топиш учун энг машҳур онлайн дастур ҳисобланади. Бундай саёҳатларнинг қулайлиги шундаки, ҳайдовчи билан исталган шаҳарга қулай вақтда ва ҳайдовчи ва йўловчи ўзлари рози бўлган нархда бориш мумкин. Шаҳарлараро қатнов учун максимал масофани чеклаш тўғрисидаги қарор кўплаб йўловчилар ва ҳайдовчиларга таъсир қилади ва бу масалани бозорнинг барча иштирокчилари Қозоғистон Республикаси Транспорт вазирлиги билан биргаликда ишлаб чиқишлари керак», — деб ҳисоблайди компания.
Мажилиснинг Ижтимоий-маданий ривожланиш қўмитаси раиси, ҳукмрон «Аманат» партиясидан депутат Асхат Аймагамбетов ҳам Транспорт вазирлиги ташаббусидан ҳайратда эканини билдирди.
«Ўйлайманки, бу оддий тушунмовчилик (...). Бироқ, агар бу ҳақиқатан ҳам шундай бўлса, ушбу ғоя муаллифлари ўзлари қўйган муаммони бундай усуллар ёрдамида ҳал қилиб бўлмаслигини тушунишлари керак. Йўқса, такси ҳайдовчилари учун «яширин бозор»га йўл очилади ва улар ўша ерда ишлашда давом этишади», — деб ёзади у ўзининг Telegram-каналида.
