Ўзбекистоннинг Air Marakanda компанияси Қозоғистоннинг Qazaq Air авиакомпанияси билан ҳамкорликни бошлади, томонлар Туркистон – Самарқанд – Туркистон йўналиши бўйича мунтазам парвозларни ташкил этди.
Туркистондан учиб келган самолёт 22 март куни кечқурун Самарқанд халқаро аэропортига қўнди. Анъанага кўра, у сув аркаси билан, йўловчилар эса карнай ва сурнай садолари билан кутиб олинди.
Биринчи рейс йўловчилари орасида Қозоғистоннинг Туркистон вилояти ҳокими биринчи ўринбосари Зулфухар Жолжасов, шунингдек, транспорт ва туризм бошқармаси бошлиқлари бўлган.
Рейслар ҳафтасига икки марта қуйидаги жадвалга мувофиқ амалга оширилади:
👉 Туркистондан жўнаш соат 20:20 – Самарқандга етиб келиш 21:20;
👉 Самарқанддан учиш 22:10 — Туркистон аэропортига етиб бориш 23:10 да.
Парвозлар Канаданинг De Havilland Dash-8-Q400NG турбовинтли самолётларида амалга оширилади. Булар қисқа ва ўрта масофали авиакомпаниялар учун 70 ўринли замонавий икки двигателли йўловчи самолётларидир. Самолётнинг тезлиги — 667 км/соат. Учиш баландлиги 8200 м. Самолёт фаол шовқинни камайтириш тизимига эга қулай салон билан жиҳозланган.
23 март куни Самарқанд шаҳрида Туркистон вилоятининг туризм салоҳияти тақдимоти бўлиб ўтди, унда туризмни ривожлантириш ва минтақада халқаро авиақатновларни йўлга қўйиш режалари муҳокама қилинди.
