pixabay.com сайти фотосурати
Google Trends ва Яндекс Wordstat маълумотларига кўра, россияликларнинг интернет орқали Қозоғистон фуқаролигини олиш тўғрисидаги сўровлари кўпайган.
Қозоғистон оммавий ахборот воситалари ва блогерлар бунга эътибор қаратишган. Агар Google Trendsда «Россия» бўлимини танлаб, «Қозоғистон фуқаролигини қандай олиш мумкин» сўровини ёзсангиз, сўнгги бир неча кун ичида бунга қизиқиш барқарор ўсиб бораётгани ва 27 февраль куни кечқурун 100 баллга етганини кўришингиз мумкин (бу сўровлар машҳурлигининг энг юқори даражасини билдиради). Шу билан бирга, Москва ва Санкт-Петербургда қозоқ фуқаролигини қандай олиш кераклиги билан фаол қизиқишган.
Шу билан бирга, Яндекс сўз қидириш хизмати маълумотлари шуни кўрсатадики, Россияда «Қозоғистон фуқаролигини қандай олиш мумкин» иборасига қизиқиш январь ойидан бошланган. Охирги бир ой ичида 3,8 мингдан ортиқ шундай қидирув сўровлари қайд этилган — бу сўнгги икки йилдаги энг катта кўрсаткичдир.
«Караван» нашри ушбу қидирув сўрови оммалашиб бораётганини Россиянинг Украинадаги ҳарбий амалиёти ва Ғарбнинг кейинги санкциялари билан боғлайди. «Эслатиб ўтамиз, Россиянинг Европа Иттифоқидаги вакили россияликларга Шенген визалари берилиши тақиқланиши назарий жиҳатдан мумкин эканлигини маълум қилди. Бу ташаббус Бельгия қочқинлар вазири томонидан илгари сурилган. Бундан олдин Латвия ва Чехия россияликларга визалар беришни тўхтатган эди», деб ёзади газета ва «қозоғистонликларни Европа визасидан маҳрум қилишмоқчи эмас», дея қўшимча қилади.
Шу билан бирга, қозоғистонлик таҳлилчилар Россия Федерациясига қарши санкциялар Қозоғистонга ҳам таъсир қилиши мумкинлигидан хавотирдалар – Ғарб бозорларидан узилиб қолган россиялик бизнес ўйинчилари республика бозорига кириб, маҳаллий ишлаб чиқарувчиларга зарба бериши мумкин. Миллий валюта курси ҳам хавотирланишга сабаб бўлмоқда. Биржанинг бугунги савдо якунларига кўра, доллар курси 495 тенгени ташкил қилган. 25 февраль, жума кунидан бери доллар деярли 28,34 тенгега, бир ой ичида эса 61,48 тенгега қимматлашган.
