Қозоғистон полицияси «Ак жол» партиясининг собиқ раиси Азат Перауашев ҳақида сохта материал эълон қилинган Exclusive.kz сайтининг клон-сайтлари эгаларини аниқламоқда. Бу ҳақда Қозоғистон парламенти — Қурултойдаги брифингда Ички ишлар вазири ўринбосари Санжар Адилов маълум қилди, деб хабар беради KazTAG.
Адиловнинг сўзларига кўра, 28 сентябрь куни қасддан ёлғон маълумот тарқатиш факти бўйича судга қадар тергов ҳаракатлари бошланган. Кибержиноятчиликка қарши курашиш бўлинмалари сайтлар эгалари ва ишга алоқадор бошқа шахсларни аниқламоқда.
Бир нечта махсус суд экспертизаси ва суд-технологик экспертизалари тайинланган.
Аввалроқ Exclusive.kz нашри унинг бош саҳифасини деярли тўлиқ кўчириб олган учта сайт-клон пайдо бўлганини хабар қилган эди. Уларнинг ҳар бирида Перауашев ҳақида нашр таҳририяти тайёрламаган ва эълон қилмаган сохта материал жойлаштирилган.
Кейинчалик «Власть» нашрида ҳам шунга ўхшаш сайт-клон пайдо бўлган. Унда ҳам Перауашев ҳақида сохта мақола эълон қилинган, қолган ҳаволалар эса ОАВнинг ҳақиқий сайтига олиб борган.
Сиёсатчининг ўзи 22 сентябрь кечқурунидан бошлаб унга сохта нашрларга ҳаволалар оммавий равишда юборила бошлаганини айтди. Перауашевнинг сўзларига кўра, у 20 дан ортиқ номаълум рақамдан хабарлар олган. Кейинчалик шунга ўхшаш хабарлар «Ак жол» Демократик партиясининг ижтимоий тармоқларидаги саҳифаларига ҳам кела бошлаган. Перауашев ва партия Ички ишлар вазирлигига ариза топширган.
Қозоғистонда бундай ахборот ҳужумлари биринчи марта қўлланилаётгани йўқ, аммо авваллари уларнинг асосий нишонлари, одатда, мухолифатчи журналистлар ва фуқаролик фаоллари бўлган.
