Ўзбекистон ҳукумати ва Осиё инфратузилмавий инвестициялар банки (ОИИБ) 2026–2029 йилларга мўлжалланган узоқ муддатли ҳамкорлик дастурини имзолади. Ҳужжат қатор ташаббусларни умумий қиймати 5 миллиард долларгача бўлган маблағ билан молиялаштириш имкониятини назарда тутади. Бу ҳақда «Газета.uz» халқаро молия институти вакилларига таяниб хабар берди.
Ҳамкорлик тўғрисидаги келишув ОИИБнинг Қатар пойтахти Доҳада ўтказилган йиллик йиғилиши доирасида имзоланди. Банк томонидан ҳужжатни минтақада давлат сектори, шунингдек, мижозларни лойиҳавий ва корпоратив молиялаштириш бўйича инвестиция йўналиши раҳбари Константин Лимитовский, Ўзбекистон ҳукумати томонидан эса Инвестициялар, саноат ва савдо вазирининг ўринбосари Шоҳрух Ғуломов имзолади.
Яқин бир неча йилга мўлжалланган янгиланган ҳаракатлар дастури ҳамкорликнинг устувор йўналишлари рўйхатини ўз ичига олган. Хусусан, гап Марказий Осиё республикасида банкнинг бевосита иштирокида амалга ошириладиган инфратузилма лойиҳалари ҳақида бормоқда.
«ОИИБнинг таъсисчи аъзоларидан бири сифатида Ўзбекистон ҳар доим ишончли ва мустаҳкам ҳамкор бўлиб келган. Мамлакатнинг инвестиция лойиҳалари рўйхати миллий устувор йўналишларни аниқ акс эттиради», — деди Лимитовский.
Ўзбекистон Республикаси Инвестициялар, саноат ва савдо вазири Лазиз Қудратов, ўз навбатида, Ўзбекистон минтақада ОИИБнинг энг йирик ҳамкори эканини таъкидлади.
«Янгиланган дастур орқали ҳамкорлигимизни янада мустаҳкамлаш, кўпроқ хусусий инвесторларни жалб қилиш ва умумий режаларимизни аниқ лойиҳаларга тезроқ айлантиришга умид қиламиз», — дея қўшимча қилди вазир.
Бундан ташқари, Доҳада томонлар Марказий Осиё республикасига ОИИБнинг Лойиҳаларни тайёрлаш махсус жамғармасидан 1,5 миллиард доллар миқдорида грант ажратиш тўғрисидаги келишувни имзоладилар. Маблағлар «Ўзбекистон электр узатиш тизимининг барқарорлигини ошириш» ташаббусини амалга оширишга йўналтирилади. Таъкидланишича, маблағлар техник тадқиқотлар ва бошқа ишларга сарфланади, улар келгусидаги инвестиция лойиҳаси учун асос бўлиб хизмат қилади.
Мазкур ташаббуснинг мақсади электр тармоқларининг ўтказувчанлик қобилиятини ошириш, уларнинг ишончлилиги ва иқлим хавф-хатарларига бардошлилигини юксалтириш, шунингдек, қайта тикланувчи энергетика объектларини тармоққа улаш учун қўшимча имкониятлар яратишдан иборат. Бунда тармоқларнинг устувор участкаларига, жумладан, Фарғона водийси ҳамда Сурхондарё ва Самарқанд вилоятлари ўртасидаги жанубий коридорга алоҳида эътибор қаратилади.
Мутахассислар қайта тикланувчи манбалардан энергия ишлаб чиқариш ҳажмининг ортиши натижасида юзага келиши мумкин бўлган муаммоларни бартараф этиш бўйича ечимларни белгилайдилар. 2030 йилга қадар Ўзбекистон экологик тоза электр энергияси ишлаб чиқариш улушини 30 фоиздан 54 фоизга етказишни режалаштирмоқда. Бунинг учун электр тармоқлари инфратузилмасини модернизация қилиш ва кенгайтириш талаб этилади.
