Эрбол Атабаев. «Мурас Юнайтед» фотосурати
Қирғизистон миллий терма жамоаси ярим ҳимоячиси Эрбол Атабаев Хорватия чемпионатининг юқори дивизионида иштирок этадиган Загребнинг «Локомотива» клубига «Мурас Юнайтед» жамоасидан ўтди. 25 ёшли футболчининг трансфери ҳақида қирғизистонлик клуб матбуот хизмати хабар берди.
Келишув тафсилотлари ошкор қилинмаган. Бироқ, трансфер эълон қилинган пайтда Атабаевнинг «Мурас Юнайтед» билан амалдаги шартномаси бор эди. Шунга кўра, трансфер учун компенсация тўланган.
Атабаев «Локомотива» сафида дебют қилганидан сўнг Хорватия олий дивизионида ўйнаган биринчи қирғизистонлик футболчига айланади.
Атабаев фаолиятидаги энг яхши мавсумлардан бирини ўтказмоқда. Август ойи охирига келиб, у асосан ярим ҳимоя марказида ўйлашига қарамай, Қирғизистон чемпионати тўпурарлар пойгасида 16 та гол билан пешқадамлик қилган. Биринчи давра якунига кўра, унинг ҳисобида 9 та голли узатма ҳам бор эди.
Атабаев Кант шаҳрида туғилган ва футбол билан шуғулланишни «Абдиш-Ата» тизимида бошлаган. Ўсмирлик даврида у Қозоннинг «Рубин» клуби ва «Барселона» тизимида машғулотлар ўтказган, кейин эса бир неча йил Испания жамоаларида тўп сурган. Катталар футболида ярим ҳимоячи Россияда ҳам ўйнаган. 2022–2023 йилларда у Махачқалъанинг «Динамо» клуби шарафини ҳимоя қилиб, жамоа билан биргаликда Биринчи лигага чиқишга эришган. Шундан сўнг Атабаев Астраханнинг «Волгарь» клубида ўйнаган ва кейин Қирғизистонга қайтган.
Атабаев Қирғизистон миллий терма жамоаси сафида 2022 йилдан буён ўйнаб келмоқда. У Сингапурга қарши учрашувда миллий терма жамоадаги дебютини ўтказган. Шундан бери мамлакат бош жамоаси сафида 25 та учрашувда майдонга тушган, жумладан, 2026 йилги жаҳон чемпионати саралаш босқичида ҳам иштирок этган.
Загребнинг «Локомотива» клуби ўтган мавсумда Хорватия чемпионати олий дивизионида бешинчи ўринни эгаллаган.
