Қозоғистон ҳукумати мамлакатдаги энг йирик нефть кони оператори — «Тенгизшевройл» компаниясини чиқиндиларни сақлаш қоидаларини бузганликда айблади, деб хаббар беради Bloomberg.
Қозоғистон Экология ва табиий ресурслар вазирлиги маълумотига кўра, июль ойида Атирау вилояти Экология департаменти Тенгиз конида режадан ташқари текширув ўтказган. Текширув якунларига кўра, объектда «рухсат этилган меъёрларни белгилайдиган экологик рухсатномасиз чиқиндилар тўплангани» аниқланган.
«Тенгизшевройл» компанияси — унинг энг йирик акциядори АҚШнинг Chevron компанияси ҳисобланади — экологик текширув хулосаларига қўшилмаган ва судгача бўлган шикоят қилиш жараёнини бошлаган. Шикоят кўриб чиқилгунга қадар компанияни маъмурий жавобгарликка тортиш жараёни тўхтатилган.
Компания вакиллари фаолият ваколатли давлат органлари томонидан берилган талаблар ва рухсатномаларга мувофиқ амалга оширилаётганини таъкидлайди.
Бу Тенгиз кони оператори иштирокидаги биринчи экологик низо эмас. 2026 йил апрель ойида «Тенгизшевройл» меъёрдан ортиқ ифлослантирувчи моддалар чиқаргани учун 53,7 миллион тенге (тахминан 113 минг доллар) миқдорида жаримага тортилган эди.
Қозоғистон сўнгги йилларда халқаро нефть консорциумларига нисбатан экологик талабларни кучайтирмоқда. 2023 йилда ҳукумат Кашаган кони оператори — North Caspian Operating Company (NCOC) консорциумига олтингугуртни меъёрдан ортиқ сақлагани учун қарийб 5 миллиард доллар миқдорида жарима даъвосини илгари сурган эди. Консорциум бу даъволарни суд тартибида рад этишга ҳаракат қилмоқда, ҳукумат эса бу вақт оралиғида унинг мол-мулкини хатлаш чораларини кўрган.
«Тенгизшевройл» Қозоғистондаги энг йирик нефть лойиҳаси бўлган Тенгиз конида иш юритади. Компания акцияларининг 50 фоизи Chevronга, 25 фоизи Exxon Mobilга, 20 фоизи «КазМунайГаз»га («Самрук-Қазина»нинг шўба корхонаси) ва 5 фоизи Россиянинг «Лукойл» компаниясига тегишли. Ҳозирда лойиҳа иштирокчилари Қозоғистон ҳукумати билан конни ўзлаштириш лицензиясини 2033 йилдан сщнг узайтириш масаласи бўйича музокаралар олиб бормоқда.
