Видеодан скриншот
Қозоғистоннинг Ақтўбе вилоятидаги (Россия билан чегарада) «Жайсан» назорат-ўтказиш пунктида юк машиналарининг навбати бошқа томондаги транспорт воситалари текширувининг секинлашиши билан боғлиқ. Бу ҳақда Қозоғистон Молия вазирлиги Давлат даромадлари қўмитаси матбуот хизмати ТАСС агентлигига маълум қилди.
Агентликнинг таъкидлашича, чегарада юк машиналарининг тирбандлиги одатда дам олиш кунларидан кейин транспорт воситаларининг кўпайиши туфайли юзага келади. Қўшни назорат-ўтказиш пунктидан юк машиналари ўтишининг секинлашиши қўшимча омил бўлган.
«Назорат-ўтказиш пунктлари орасидаги инфратузилма номутаносиблиги ҳам сезиларли таъсир кўрсатмоқда: «Жайсан» назорат-ўтказиш пунктида тўртта, қўшни «Сагарчин» пунктида эса иккита ҳаракатланиш йўлаги фаолият юритяпти», — деб қўшимча қилди қўмита.
Давлат даромадлари қўмитаси шунингдек, транспорт воситаларининг кўпайиши мавжуд инфратузилмага юк тушираётгани, транспорт воситаларининг узлуксиз ҳаракатланишини таъминлашни қийинлаштираётгани ва тирбандликка олиб келаётгани ҳақида хабар берди.
Ақтўбе ва Оренбург ўртасидаги чегара ўтиш пунктида юк машиналарининг тирбандлиги ҳақида хабарлар ўтган дам олиш кунлари пайдо бўлди. Telegram каналларига кўра, кутиш вақти икки-уч кунга етиб бормоқда.
Шу билан бирга, Россия Федерал божхона хизмати бир кун олдин тирбандлик Россия божхона органларининг иши билан боғлиқ эмаслигини маълум қилди. ташкилот Россия Беларусь, Қозоғистон, Қирғизистон ва Арманистон билан чегарада божхона текширувларини ўтказмаслигини яна бир бор таъкидлади. Мобил божхона гуруҳлари СПОТ (бу — товарлар етказиб берилишини кутиш ҳолатини тасдиқловчи миллий тизим) тўғрисидаги федерал қонунга мувофиқ тасодифий текширувларни ўтказадилар.
«QR-кодини текшириш бир дақиқадан кам вақтни олади ва транспортнинг чегарадан ўтиш ҳаракатига таъсир қилмайди», — деб таъкидлайди ФБХ.
Сўнгги ойларда Қозоғистон ва Россия чегарасида юк машиналари навбатлари мунтазам равишда пайдо бўлмоқда. Икки мамлакат божхона хизматлари одатда тирбандлик ва уларнинг иши ўртасидаги ҳар қандай боғлиқликни рад этиб келади.
