Тошкентдаги Ислом цивилизацияси марказида Ўзбекистондаги биринчи интерактив болалар музейи очилди. Очилиш маросими 1 июн – Халқаро болаларни ҳимоя қилиш куни муносабати билан ўтказилди, деб хабар беради ИЦМ матбуот хизмати.
Очилиш маросимида Ўзбекистон Ислом цивилизацияси маркази директори Фирдавс Абдухолиқов кўргазма болаларда илм-фан, тарих ва ижодга қизиқиш уйғотиш мақсадида ташкил этилганини таъкидлади.
«Зеро, буюк аждодларимиз ёшлигидаёқ юксак муваффақиятларга эришган: Ибн Сино ўн олти ёшида билими билан машҳур бўлган, Беруний ёшлигидан астрономия илмини ўрганган, Мирзо Улуғбек ёш ҳукмдор сифатида илм-фан ривожига улкан ҳисса қўшган», – дея қўшимча қилди директор.
Кўргазма 7 ёшдан 12 ёшгача бўлган болалар ва ўсмирлар учун мўлжалланган. У ташриф буюрувчиларни мамлакат тарихи ва STEM (фан, технология, муҳандислик ва математика) соҳалари билан таништиради. Музейнинг барча мазмуни ва навигация материаллари уч тилда – ўзбек, рус ва инглиз тилларида тақдим этилган
Музей майдони тўртта зални ўз ичига олади, улар ўнлаб юқори технологияли станциялар билан жиҳозланган.
Биринчи залда меҳмонларни анимацион инсталяциялар ва «Ўзбекистондан дунёга 1001 ихтиро» номли катта ёритилган китоб кутиб олади. Болалар саккизта сенсорли экранда ўз билимларини синаб кўришлари мумкин бўлади.
Иккинчи залда, олимлар галереясида буюк аждодларнинг мумдан ясалган фигуралари ва рақамли аватарлар намойиш этилган. Болалар олимларнинг ёшлигидаги суратлари билан мулоқот қилишлари мумкин.
Учинчи залда, кинотеатрда сунъий интеллект ёрдамида яратилган олти дақиқалик анимацион фильм намойиш этилади.
Асосий интерактив майдон — тўртинчи зал — ижодкорлик ва фан лабораторияси.
Бу ерда ал-Хоразмий концепциясига асосланган станция ўрнатилган: катта шар машинаси ва мантиқий ва математик тафаккурни ривожлантирувчи магнит девор.
Аҳмад ал-Фарғоний мероси болаларни сув ҳаракати билан таништирувчи гидроинтерактив «Гирдоб» билан ифодаланади.
Коинот ва сайёраларни кузатишга мўлжалланган рақамли телескопда Мирзо Улуғбек ва Али Қушчининг илмий мероси ўз аксини топган.
Ибн Синонинг табобати ва инновациялари реакция тезлигини ўлчаш асбоблари ва ҳаракатларни мувофиқлаштириш ва мувозанат ҳиссини ўргатишда ёрдам берадиган ICAROS (виртуал реаллик) замонавий VR тизими билан ифодаланади.
Санъат ва маданият бўлимида рақамли граффити IR-спрей, мусиқа девори ва рангли соялар ўрнатилган.
Музей кўргазмаси болаларни ҳимоя қилиш халқаро сиёсати талабларига мувофиқ ишлаб чиқилган. Ҳудудда хавфсизлик чоралари кучайтирилган. Ёш ташриф буюрувчиларга ҳар нарсада махсус тайёрланган ходимлар ёрдам беради.
ℹ️ Ислом цивилизацияси маркази Хасти-Имом мажмуаси ёнида қурилмоқда. Иншоот қадимги меъморий обидалар шаклида бунёд этилди. Мажмуанинг тўрт томонида баландлиги 34 метрли пештоқлар, ўртада 65 метрли гумбаз қурилган. Бу ерда Қуръон зали, 460 ўринли анжуманлар зали ва музей мавжуд бўлиб, кўргазмалар Ўзбекистоннинг исломгача бўлган даврдан то ҳозирги кунгача бўлган бутун тарихини қамраб олади. ИЦМ Ўзбекистон халқаро исломшунослик академияси ва дунёнинг ихтисослаштирилган илмий-таълим марказлари билан ҳамкорликда аждодлар меросини ўрганиш, идрок этиш борасида маърифий масканга айланиши кўзда тутилган.
