Бруклиндаги федерал суди биноси. ibtimes.com сайти фотосурати
Қирғизистон фуқароси Сергей Жарновников Бруклиндаги федерал судда Америка ўқотар қуроллари ва ўқ-дориларини Россияга ноқонуний экспорт қилиш бўйича махфий келишувда иштирок этгани учун 39 ойлик қамоқ жазосига ҳукм қилинди. Бу ҳақда АҚШ Адлия вазирлиги хабар берди.
Ҳукм 22 январь куни чиқарилган. Жазони ўтаб бўлганидан сўнг, бизнесмен АҚШда қонуний яшовчи резидент мақомига эга бўлмагани учун депортация қилиниши мумкин.
Иш материалларига кўра, Жарновников Бишкекда ўзига тегишли компания орқали қурол савдоси билан шуғулланган. 2020 йил март ойидан бери у бошқа одамлар билан АҚШ Савдо вазирлиги томонидан назорат қилинадиган ўқотар қуроллар ва ўқ-дориларни АҚШдан Россияга экспорт қилиш бўйича махфий келишувда иштирок этган. У Россияга 1,5 миллион доллардан ортиқ қийматдаги ўқотар қуроллар ва ўқ-дориларни етказиб беришга муваффақ бўлган.
Битимлардан бирида Жарновников Қирғизистонга ўқотар қурол сотиб олиш ва экспорт қилиш бўйича Америка компанияси билан беш йилга 900 минг долларлик шартнома тузган. АҚШ Савдо вазирлиги қирғиз компаниясига қурол экспорти лицензиясини берган, аммо мазкур ҳужжат қуролларни Россияга экспорт ёки қайта экспорт қилишни тақиқлаган. Тақиққа қарамай, Жарновников қуролларни Россияга реэкспорт қилган.
Бошқа бир битим бўйича бизнесмен яна бир бир Америка компаниясидан бешта милтиқни худди шу тарзда қайта экспорт қилган. Терговчиларнинг сўзларига кўра, бу милтиқлар Россия ҳарбий снайперлари томонидан Украинадаги жанговар операцияларда ишлатилган.
Бундан ташқари, Жарновников Америкада ишлаб чиқарилган ўқ-дориларни Италиядан Қирғизистонга ва охир-оқибат Россияга ноқонуний равишда реэкспорт қилиш бўйича фитнада иштирок этган — бу ҳам АҚШ қонунларини бузган. Бошқалар билан бирга у буюртма берган ва Италия орқали учинчи Америка компаниясидан 23 000 долларлик 13 000 та ўқ-дори сотиб олган. Ушбу ўқ-дориларга берилган лицензия уларнинг Италияда қолишини талаб қилган. Шунга қарамай, Жарновников ўқ-дориларни Италиядан Қирғизистонга ва кейинчалик Россияга қайта экспорт қилган.
Қирғизистонлик бизнесмен 2025 йил 24 январда Лас-Вегасда ҳибсга олинган. Тадбиркор америкалик қурол сотувчилари билан учрашиш учун ов ва отиш спорти анжомлари ва жиҳозларини сотадиган Shooting, Hunting and Outdoor Trade (SHOT) кўргазмасига келган.
2025 йил июнь ойида Жарновников айбини тан олган. Дастлабки айбловлар бўйича у 20 йилгача қамоқ жазосини олиши мумкин эди.
«Санкцияларимиз уларни амалга ошириш имкони даражасида самарали бўлади. Бугунги ҳукм потенциал қоидабузарларга муждадир: мазкур қонунни бузиш жиддий оқибатларга олиб келади», — деди Нью-Йоркнинг Шарқий округи федерал прокурори Жозеф Ночелла Жарновниковга ҳукм чиқарилганидан сўнг.
