Қирғизистон президенти Садир Жапаров педофиллар, шунингдек, аёлларни зўрлаб, кейин уларни ўлдирган қотиллар учун ўлим жазосини тиклашни буюрди. Бу ҳақда давлат раҳбари матбуот котиби Аскат Алагозов маълум қилди.
«Президент ўз Администрациясининг Ҳуқуқий таъминот бўлими мудири Мурат Укушевга болалар, қизлар ва аёлларга нисбатан жиноятлар учун энг оғир жазони назарда тутувчи қонунчиликка ўзгартиришлар киритиш лойиҳасини ишлаб чиқишни топширди. Жумладан, бу болаларни зўрлаш, шунингдек, аёлларни зўрлаб, сўнг ўлдирганлик учун ўлим жазосини жорий этиш билан боғлиқ», — деди Алагозов.
Унинг сўзларига кўра, Жапаров сентябрь ойи охирида зўрланган ва кейин бўғиб ўлдирилган 17 ёшли қоракўллик қизнинг ўлимига нисбатан шундай жавоб қайтарган. Бишкекда 1984 йили туғилган, илгари судланган шахс гумон қилиниб, қўлга олинган.
Жапаров болалар ва аёлларга нисбатан содир этилган жиноятлар жазосиз қолмаслигини таъкидлади, дея қўшимча қилган Алағозов. Президент қизнинг ўлдирилиши бўйича ишни шахсан назорат остида олган.
Бир кун аввал, 30 сентябрь куни Қирғизистон қонун ҳужжатлари лойиҳалари жамоатчилик муҳокамаси порталининг «Фуқаролар таклифлари» бўлимида «вояга етмаганларнинг ҳаёти ва жинсий дахлсизлигига қарши ўта оғир жиноятлар учун жазонинг алоҳида чораси сифатида» ўлим жазосини жорий этиш ҳақидаги чақириқ эълон қилинган эди. Бироқ, таклиф муаллифига кўра, ўлим жазоси аёллар ва вояга етмаганларга нисбатан қўлланилмаслиги керак.
ℹ️ Қирғизистонда 1998 йили қатлларга мораторий эълон қилинганда, жазо тури сифатида ўлим жазоси бекор қилинган, бироқ судлар узоқ вақт давомида ўлим жазоси ҳукмини чиқаришда давом этган. 2007 йили ўлим жазоси амалда бекор қилинди, ўшанда у умрбод қамоқ жазоси билан алмаштирилди. Бунгача 2006 йили Қирғизистон Конституциясидан ўлим жазоси ҳақидаги эслатма олиб ташланди, 2010 йили эса мамлакат ўлим жазосини тақиқловчи ва уни қайтадан жорий қилмаслик мажбуриятини олган халқаро протоколни ратификация қилган. Уни қайта тиклаш учун мамлакат Асосий қонунига ўзгартиришлар киритиш ва референдум ўтказиш керак бўлади.
Қирғизистонда педофиллар учун ўлим жазосини қайта тиклаш чақириғи бир неча бор янграган. Масалан, 2022 йил октябрь ойида Жогорку Кенеш (мамлакат парламенти) бир гуруҳ депутатлари шундай истак билдиришганди. Ҳуқуқ ҳимоячилари адолатли ва мустақил суд тизими бўлмаса, унинг жорий этилиши эрта ва хавфли, дея ўлим жазосига қўйилган тақиқнинг бекор қилинишига қарши чиқишганди.
