icma.az сайти фотосурати
Тожикистон ва Қирғизистон ўртасидаги ўзаро товар айирбошлаш ҳажми 2025 йил биринчи беш ойида 6,35 миллион долларга етди, бу ўтган йилнинг шу даврига нисбатан 15,6 баробар кўпдир. Бу ҳақда «Азия-плюс» нашри хабар берди.
Тожикистон божхона хизмати маълумотларига кўра, республикадан Қирғизистонга экспорт 1,59 миллион долларни, қўшни давлатдан импорт эса 4,76 миллион долларни ташкил қилган. Таққослаш учун: 2024 йил январь-май ойларида икки давлат ўртасидаги товар айирбошлаш атиги 405,1 минг долларни ташкил қилган.
Мутахассислар савдонинг кескин кучайганини сиёсий муносабатларнинг тиклангани, давлат чегарасини делимитация ва демаркация қилиш масаласи ҳал этилгани ва янги назорат-ўтказиш пунктлари очилгани, шунингдек, Қирғизистон президенти Садир Жапаровнинг Душанбега 8 июль куни бошланган давлат ташрифига фаол тайёргарлик кўрилгани билан изоҳлашмоқда.
Хусусан, 30 июнь куни Чўлпон-Ота шаҳрида Тожикистон Ташқи ишлар вазири Сирожиддин Мухриддиннинг ташрифи чоғида томонлар иқтисодий ҳамкорликни кенгайтириш ва товар айирбошлаш ҳажмини 500 миллион долларга етказиш ниятини тасдиқлади. Йил бошидан буён 15 та битим, жумладан, чегаравий келишувлар тасдиқланди, сиёсий ва гуманитар яқинлашувга эришиш учун қадамлар ташланди. 7 июль куни икки давлат иқтисодиёт ва савдо вазирлари савдо айланмасини ошириш бўйича йўл харитасини ишлаб чиқишга келишиб олдилар. Ҳужжатда томонларни қизиқтирган товарларни экспорт ва импорт қилиш, савдо тартиб-таомилларини соддалаштириш, товарларни ташиш ва транзит қилиш, рақамлаштириш, электрон тижорат, иқтисодий ва савдо йўлакларидан фойдаланиш билан боғлиқ зарур чора-тадбирларни ўз ичига олади.
ℹ️ Сўнгги ўн йил ичида Тожикистон ва Қирғизистон ўртасидаги товар айирбошлаш ҳажми бир неча бор ўзгарган:
👉 2018–2019 йиллари товар айирбошлаш қарийб 60 миллион долларга етган (Қирғизистондан импорт — 48 миллион доллардан, Тожикистондан экспорт — 14 миллион доллардан ортиқ);
👉 2020 йили — барқарор пасайиш бошланди;
👉 2021 йили — 26,2 миллион доллар;
👉 2022 йили — 15 миллион доллар;
👉 2023 йили — 11,4 миллион доллар;
👉 2024 йили — тахминан 11,6 миллион доллар.
ℹ️ Икки давлат президентлари 13 март куни қирғиз-тожик чегараси бўйича келишувни имзоладилар, бир вақтнинг ўзида бир неча йиллардан бери фаолият кўрсатмаётган чегара пунктларини очдилар. Ҳужжат 31 март куни тегишли ратификация ёрлиқлари алмашилганидан сўнг кучга кирди.
