Қамчибек Ташиев. economist.kg сайти фотосурати
Миллий хавфсизлик давлат қўмитаси (МХДҚ) раҳбари ва Қирғизистон Бош вазири ўринбосари Қамчибек Ташиев Норин вилоятида коррупцияга оид жиноятлар камлигидан норозилигини билдирди. Бу ҳақда Kaktus.Media хабар берди.
У вилоят раҳбарияти ва ҳуқуқ-тартибот идоралари вакиллари билан бўлиб ўтган йиғилишда қонунчиликка янги ўзгартиришлар кучга кирган 2025 йил январь ойидан буён қанча одам коррупция бўйича судланганини сўради. Прокуратура вакилининг хабар беришича, олти ой ичида саккиз киши судланган.
«Жуда кам! Бу ерда коррупционерлар талайгина. Шуни ёдда тутинг. Эшитдингизми, прокуратура, милиция, хавфсизлик идоралари? Коррупционерлар кўп. Вилоятда олти ойда саккиз киши жуда кам. Менда Норин вилоятининг қишлоқ аймоқлари ҳақида жуда кўп маълумотлар бор. Ер сотганлар бор, улар устидан иш олиб боринг. Ишингиз натижаларини текшираман», — дея огоҳлантирган Ташиев.
Унинг таъкидлашича, асосий коррупция оддий фуқаролар орасида эмас, балки давлат идораларида жамланган. МХДҚ раҳбарининг фикрича, майда порахўрлик билан боғлиқ кундалик коррупцияни давлат идоралари, жумладан, ҳуқуқни муҳофаза қилувчи органлар ва маҳаллий ҳокимликлардаги йирик ўғирликлар билан солиштириб бўлмайди.
Ташиев эндиликда айбга иқрор бўлиш, етказилган зарарни қоплаш шахсни жазодан озод қилмаслигини эслатиб ўтди: «Айбга иқрор бўлиш, терговга рози бўлиш ва зарарни тўлаш сени қамоқдан ҳимоя қилмайди, муддатнинг камида ярмини қамоқда ўтайсан. Шунинг учун сиз ҳам тергов ва суд жараёнида қаттиқ қарорлар қабул қилинг. Моддани ўзгартирманг».
Ташиев, шунингдек, маҳаллий давлат ҳокимияти органлари ва ҳуқуқни муҳофаза қилувчи идоралар раҳбарлари ишини энди шахсан ўзи назорат қилишидан огоҳлантирди.
«Қўшнилар билан муаммоларни ҳал қилдик, энди ички муаммоларни ҳал қилиш керак... Энди мен сиз билан шуғулланаман, буни ёдда тутинг, маҳаллий ҳокимликлар, ҳуқуқ-тартибот идоралари, адлия органлари, хавфсизлик идоралари раҳбарлари», — деди Бош вазир ўринбосари.
У мутасаддиларни қишлоқ округлари, йўллар ва инфратузилмаларда тартиб ўрнатишга чақириб, мунтазам равишда ҳудудларга чиқиб, натижаларни кузатиб боришини таъкидлади.
Эслатиб ўтамиз, аввалроқ Қирғизистон президенти Садир Жапаров 2025 йил сентябридан бошлаб амалдорлар фаолиятига доир кенг кўламли аудит ўтказилишини маълум қилганди. Унинг сўзларигакўра, инфратузилма лойиҳаларига ажратилаётган бюджет маблағлари қандай сарфланаётганини баҳолаш учун мустақил экспертлар комиссияси тузилади. Жапаров коррупцияда айбдор деб топилган амалдорлар ўғирланган пулларни ўн баробар қилиб қайтариб, панжара ортига тушишига ваъда берди.
«Ким бўлсангиз ҳам, раҳм-шафқат бўлмайди, жазосизлик вақтларини унутинг», — дея таъкидлади Қирғизистон Президенти.
ℹ️ 2024 йил сентябрь ойида Ташиев Жапаров ҳокимиятга келганидан сўнг коррупция камайганига қарамай, порахўрлик ва суиистеъмоллик жиддий муаммо бўлиб қолаётганини таъкидлаган эди. У коррупционерлар жазоланишини, уларнинг қариндошларига давлат лавозимларида ишлаш тақиқланишини таъкидлаганди.
Илгари МХДҚ раҳбари Қирғизистонни 2026 йилгача криминалдан, парламентни эса коррупцияга ботган депутатлар ва амалдорлардан тозалашга ваъда берганди.
