Шавкат Мирзиёев ва Қасим-Жомарт Тўқаев. Ўзбекистон президенти матбуот хизмати фотосурати
Ўзбекистон Президенти Шавкат Мирзиёев Самарқандда бўлиб ўтаётган «Марказий Осиё – Европа Иттифоқи» саммити доирасида Қозоғистон президенти Қосим-Жомарт Тўқаев, Қирғизистон президенти Садир Жапаров, Тожикистон президенти Эмомали Раҳмон ва Туркманистон президенти Бердимуҳамедовни қабул қилди. Бу ҳақда Ўзбекистон Президенти матбуот хизмати хабар берди.
Конгресс-холлга биринчи бўлиб Туркманистон раҳбари Сердар Бердимуҳамедов келди. Томонлар 2024 йил якунига кўра 1,1 миллиард АҚШ долларидан ошган товар айирбошлаш ҳажми барқарор ўсиб бораётганини қайд этдилар. «Шовот-Тошовуз» чегараолди савдо зонасини ташкил этиш масаласи ҳам муҳокама қилинди.
Қирғизистон президенти Садир Жапаров билан учрашувда 31 март куни Хўжандда имзоланган Давлат чегараларининг туташ нуқтаси тўғрисидаги тарихий шартнома тафсилотлари муҳокама қилинди. Олий даражадаги келишувларни амалга ошириш масалалари, хусусан, саноат, транспорт, энергетика ва инфратузилма соҳаларида муҳим ҳамкорлик лойиҳаларини амалга оширишни жадаллаштириш чора-тадбирлари кўриб чиқилди.
Тожикистон раҳбари Эмомали Раҳмон билан суҳбат чоғида томонлар Давлат чегараларининг туташ нуқтаси тўғрисидаги Битим имзоланишининг аҳамиятини муҳокама қилиб, чегара масалаларини тўлиқ ҳал этиш минтақавий ҳамкорликни ривожлантиришда янги саҳифа очишини таъкидладилар. Ўзбекистон-Тожикистон ўртасидаги дўстлик, яхши қўшничилик, стратегик шериклик ва иттифоқчилик муносабатларини янада чуқурлаштиришнинг долзарб масалалари муҳокама қилинди.
Қозоғистон Президенти Қосим-Жомарт Тўқаев билан суҳбатда икки давлат раҳбарларининг яқинда Олмаота шаҳрида бўлиб ўтган норасмий учрашувида эришилган келишувлар контекстида Ўзбекистон-Қозоғистон стратегик шериклик ва иттифоқчилик муносабатларини янада ривожлантириш ва мустаҳкамлашнинг долзарб масалалари муҳокама қилинди. Шунингдек, Халқаро саноат кооперацияси марказини ишга тушириш бўйича ишларни жадаллаштиришга келишиб олинди.
ℹ️ Самарқандда «Марказий Осиё – Европа Иттифоқи»нинг биринчи саммити бўлиб ўтмоқда. Тадбирда Европа кенгаши президенти Антонио Коста, Европа комиссияси президенти Урсула фон дер Ляйен, Ўзбекистон президенти Шавкат Мирзиёев, Қозоғистон президенти Қосим-Жомарт Тўқаев, Қирғизистон президенти Садир Жапаров, Тожикистон президенти Эмомали Раҳмон ва Туркманистон президенти Сердар Бердимуҳамедов иштирок этмоқда. «Келажакга сармоя киритиш» шиори остида ўтказилаётган саммитда Европа тикланиш ва тараққиёт банки ҳамда Европа инвестиция банки раҳбарлари ҳам иштирок этмоқда.
