Эркинбек Чодуев. reporter.kg сайти фотосурати
Қирғизистон Миллий хавфсизлик давлат қўмитаси (МХДҚ) ходимлари мамлакатнинг собиқ қишлоқ хўжалиги вазири Эркинбек Чодуевни коррупция ва фирибгарликда гумон қилиб қўлга олди. Бу ҳақда махсус хизмат пресс-релизига таяниб, 24.kg хабар берди.
Тергов маълумотларига кўра, мансабдор шахс «Лиматех пахта корпорацияси» ижрочи директори бўлиб, Ўш ва Жалолобод вилоятларидаги умумий майдони 50 гектардан ортиқ бўлган ер участкаларини ноқонуний равишда хусусийлаштирган. Кейинчалик Чодуев бу активларни хусусий шахсларга сотган. Шундай қилиб, давлатга 500 миллион сўм (5,5 миллион доллар) миқдорида зарар етказилган, дея хулоса қилади ҳуқуқ-тартибот идораси.
Собиқ вазирга нисбатан Қирғизистон Жиноят кодексининг 222-моддаси («Жиноий даромадларни қонунийлаштириш (ювиш)») бўйича иш қўзғатилган. Ҳозирда Чодуев Миллий хавфсизлик давлат қўмитасининг вақтинчалик сақлаш изоляторига сақланмоқда. Мутахассислар ушбу коррупцияга алоқадор бошқа шахсларни аниқлаш ишларини давом эттирмоқда.
Эслатиб ўтамиз, бу хавфсизлик кучларининг ҳукумат аъзоларини коррупцияда айблашига доир биринчи ҳолат эмас. Шундай қилиб, 2022 йил июнь ойида Соғлиқни сақлаш вазирлиги раҳбари Алимқодир Бейшеналиев қамоққа олинган ва тез орада ўз лавозимидан четлаштирилганди. Бош прокуратура маълумотларига кўра, у бошқа мансабдор шахслар билан биргаликда давлатга йирик миқдорда зарар етказган ҳолда пул ювиш усулини ташкил қилган. Бироқ орадан икки ой ўтиб, жиноят иши жиноят аломатлари йўқлиги сабабли тўхтатилган. Бундан ташқари, 2023 йил сентябрида Бейшеналиев Соғлиқни сақлаш вазири лавозимига қайтган.
ℹ️ Эркинбек Чодуев 2019 йил май ойида республика Қишлоқ хўжалиги, озиқ-овқат саноати ва мелиорация вазирлигини бошқарган эди. 2020 йил октабрь ойида Қирғизистон президенти девони матбуот хизмати унинг истеъфога чиққанини эълон қилганди. Аниқлик киритилишича, амалдор ихтиёрий, ўз хоҳиши билан ишдан кетган.
