"Химпэк" заводидаги цехлардан бири. shahty.ru сайти фотосурати
Тожикистон Меҳнат, миграция ва аҳоли бандлиги вазирлигининг Россиядаги ваколатхонаси Ростов вилоятининг Шахти шаҳридаги «Химпэк» заводида ишлаётган юртдошларнинг иш ташлашига иш ҳақини ошириш талаби сабаб бўлганини аниқлаган. Бу ҳақда вазирликнинг берилган сўров бўйича таҳририятга юборган жавобига таяниб, «Азия-плюс» хабар берди.
Вазирликнинг аниқлик киритишича, 15 январдан бошлаб муҳожирлар бир неча кун давомида иш ташлаш уюштиришган. Ишчиларни аввалли Буюк Британияда ишлаган икки-учта ҳамкасби иш ташлашга чақирган. Акцияда нафақат Тожикистон фуқаролари, балки Ўзбекистон фуқаролари ҳам иштирок этишган.
Ишчилар иш ҳақини 20-25 фоизга оширишни талаб қилишган, гарчи ўтган йили «Химпэк» раҳбарияти уларнинг маошларини 15 фоизга – ўртача 80-85 минг рублга (тахминан 930 доллар) оширган бўлсаям.
Иш ташлаш натижасида корхона маъмурияти 35 нафар тожикистонликни, жумладан иш ташлаш провакаторларини ишдан бўшатган. Бироқ, Ўрта Осиё Республикаси Меҳнат вазирлиги ваколатхонасининг аралашувидан сўнг 25 киши иш жойига қайтган.
«Учрашув давомида ишчи гуруҳ яшаш ва меҳнат шароитлари билан танишиб, иш берувчи ходимлар билан тузилган меҳнат шартномаси бўйича барча мажбуриятларини бажарганлиги ва ҳеч қандай қоидабузарликка йўл қўймагани аниқланди», — дейилади Тожикистон агентлиги хабарида.
Таъкидланишича, можарони якуний ҳал қилиш учун Россия заводи раҳбарияти ва меҳнат мигрантлари ўртасида яна бир учрашув ўтказилиши режалаштирилган. Меҳнат вазирлиги ваколатхонаси вазиятни назоратга олган.
Бир неча кун олдин оммавий ахборот воситалари завод раҳбарияти «ваъда қилинган иш ҳақини ошириш» ва пуллик таътил бериш шартларини бажармаганидан норози бўлган Шахти корхонасида мигрантларнинг иш ташлаши ҳақида маълумот тарқатганди. Ўшанда юзга яқин мигрант ишдан бўшатилгани ҳақида хабар берилган эди.
ℹ️ «Химпэк» компанияси юк ташиш учун контейнер ва қоплар ишлаб чиқарувчи йирик корхона бўлиб, бозорни кимё, металлургия, шиша, қурилиш ва бошқа хомашё билан таъминлайди.
