yandex-images.clstorage.net фотосурати
Янги ўқув йилидан Ўзбекистондаги мактабгача таълим муассасаларида «Гимнастикага илк қадам», бошланғич синфларда эса «Болалар учун гимнастика» дастурлари жорий этилади. Бу Президентнинг «Гимнастика спорт турларини янада ривожлантириш чора-тадбирлари тўғрисида»ги қарорида назарда тутилган.
Болалар боғчаларида гимнастикага асосланган қизиқиш ва мунтазам машқларни ошириш учун тўгараклар очилади. «Болалар учун гимнастика» дастури доирасида спорт заллари бўлган, ўқувчилари гимнастика билан шуғулланишга катта қизиқиш билдираётган умумтаълим мактаблари аниқланади. Уларда махсус спорт секциялари очилиб, гимнастика спорт турлари бўйича синфдан ташқари машғулотлар ўтказилади.
2024/2025 ўқув йилидан бошлаб гимнастика спорт турлари бўйича ихтисослаштирилган спорт мактаблари негизида гимнастика марказлари очилади. Уларнинг вазифаси гимнастика спорт турлари бўйича иқтидорли спортчиларни саралаш ҳамда уларни асосан терма жамоаларга номзод қилиб тайёрлашдан иборат бўлади.
Гимнастика марказларига танлов рақобатдош бўлади. Ўқувчиларнинг умумий сони 132 кишини ташкил қилади — булар 1-11 синф ўқувчиларидан иборат бўлади. Марказларнинг ўқув режасини ўзлаштириб, якуний давлат аттестациясидан ўтган битирувчилари ўқитувчи ёки тренер-селекционер сифатида ишлаш ёки таълимнинг кейинги босқичларида ўқишни давом эттириш ҳуқуқини берувчи давлат дипломига эга бўладилар.
2023/2024-ўқув йилидан бошлаб Ўзбекистон давлат жисмоний тарбия ва спорт университети ҳамда унинг филиалларида гимнастика бўйича ўқувчилар қабули икки баравар кўпаяди.
2023 йил 1 январдан Ўзбекистонда гимнастика спорт турлари бўйича қуйидаги мусобақалар анъанавий тарзда ўтказилади:
👉 гимнастрада спорт тури бўйича хотин-қизлар ўртасида Ўзбекистон Республикаси Президенти кубоги;
👉 бадиий гимнастика бўйича ёшлар ўртасида “Ёрқин юлдузча” ва катталар ўртасида «Grand Prix Uzbekistan» халқаро турнири;
👉 спорт гимнастикаси бўйича «Духоба йўл» халқаро турнири;
👉 трамполин бўйича «Самодан баланд» халқаро турнири;
👉 халқаро гимнастика кунига бағишлаб ўтказиладиган «Gymnastics Day» бутун Ўзбекистон оммавий форуми;
👉 умумий ўрта таълим мактаблари ўқувчилари ўртасида «Халқ таълими вазири кубоги»;
👉 гимнастика спорт турлари бўйича Халқаро гимнастика федерациясининг тасдиқланган норма ва қоидаларида белгиланган ёш тоифалари бўйича уч босқичли (туман/шаҳар, ҳудудий ва республика) чемпионатлар ва кубоклар.
