tatelprof.ru сайти фотосурати
Ўзбекистон Ахборот кодекси лойиҳасида «бир жинс вакиллари ўртасидаги ғайритабиий муносабатлар»ни тарғиб қилишни тақиқлаш назарда тутилган. Ҳужжат Ўзбекистон Президенти ҳузуридаги Ахборот ва оммавий коммуникациялар агентлиги (АОКА) томонидан тайёрланиб, жамоатчилик муҳокамасига ҳавола этилди.
Кодекс «Ахборот олиш кафолатлари ва эркинлиги тўғрисида», «Журналистлик фаолиятини ҳимоя қилиш тўғрисида», «Болаларни уларнинг соғлиғига зарар етказувчи ахборотдан ҳимоя қилиш тўғрисида»ги, «Давлат ҳокимияти ва бошқаруви органлари фаолиятининг очиқлиги тўғрисида»ги каби маълумотларни узатиш ва тарқатиш соҳасидаги саккизта амалдаги қонун ҳужжатларидаги нормаларни ўз ичига олади
Шуни таъкидлаш лозим, амалдаги қонунчиликда «бир жинс вакиллари ўртасидаги ғайритабиий муносабатлар» ибораси мавжуд эмас. Ахборот кодекси лойиҳасида у икки марта — 45 ва 54-моддаларда порнография, зўравонлик ва шафқатсизликни тарғиб қилиш билан бирга қўлланилган.
ℹ️ Ўзбекистонда эркаклар ўртасида ихтиёрий гомосексуал муносабатлар жиноят ҳисобланади. Республика Жиноят кодексининг 120-моддаси («Бесоқолбозлик») бир йилдан уч йилгача озодликни чеклаш ёки уч йилгача озодликдан маҳрум қилиш тарзидаги жазони назарда тутади.
