РИА Новости фотосурати
Россия Бош вазири Михаил Мишустин Ўзбекистонда атом электр станциясини қуриш лойиҳаси доирасидаги келишувларни амалга оширишни тезлаштиришга чақирди. Бу ҳақда ТАСС хабар берди.
«Биз атом энергетикаси соҳасидаги ҳамкорликни мустаҳкамлашни муҳим деб биламиз. Йирик лойиҳа Россия томонидан лойиҳалаштирилган атом электр станциясини биргаликда қуриш бўлади. Эришилган барча келишувларни амалга оширишни тезлаштириш зарур», — деди Мишустин 2 декабрь куни Самарқандда Россия ва Ўзбекистон ҳукумат раҳбарлари даражасидаги қўшма комиссиянинг учинчи йиғилишида.
Мишустин бир кун аввал Ўзбекистон Бош вазири Абдулла Арипов билан энергетика соҳасидаги лойиҳаларни муҳокама қилганини айтди.
«Энг истиқболли соҳалардан бири бу энергетика. Ўзбекистонда Россиянинг йирик компаниялари фаолият юритмоқда, нефт-газ, энергетика лойиҳалари муваффақиятли амалга оширилмоқда. Россиянинг энергетика соҳасига киритган сармояларининг умумий ҳажми 12 миллиард долларни ташкил этади», — деди Мишустин.
Июнь ойида «Ўзатом» агентлиги Ўзбекистонда атом электр станцияси қурилиши лойиҳасини амалга ошириш бўйича ишлар тасдиқланган жадвал асосида давом этаётгани ва якуний босқичда эканлиги ҳақида хабар берганди. Айни пайтда Ўзбекистон Энергетика вазирлиги мамлакат расмийлари ҳалигача бундай лойиҳани амалга ошириш мақсадга мувофиқлигини тасдиқлай олмаганини маълум қилди.
«Бир томондан, лойиҳа қазиб олинадиган ёқилғига қарамликни камайтириши билан жуда қизиқ. Қуёш ва шамол энергиясидан фарқли ўлароқ, у барқарор ишлаб чиқариш [электр энергияси] учун анча юқори кафолатлар беради. Бошқа томондан, шуни таъкидлаш жоиз, соф иқтисодий нуқтаи назардан бу лойиҳа бошқа авлод турларидан анча паст», — деб тушунтирди Энергетика вазири ўринбосари Шерзод Хўжаев.
