Rtoshpulat.blogspot.com сайти фотосурати
Абу-Даби тараққиёт жамғармаси Самарқанд шаҳрининг сув таъминоти тизими ва йўл тармоғини модернизация қилиш учун Ўзбекистонга 1,1 миллиард дирҳамдан (300 миллион доллар) ортиқ маблағ ажратади. Тегишли фармонни Ўзбекистон Президенти Шавкат Мирзиёев имзолади.
Лойиҳанинг умумий қиймати 1,316 млрд дирҳамдан (358 млн доллар) иборат бўлиб, кредит тўрт йиллик имтиёзли давр билан 17 йилга берилди. Лойиҳани якунлаш 2026 йилга мўлжалланган.
Кредит маблағларидан мақсадли ва самарали фойдаланиш Самарқанд вилояти ҳокимлиги зиммасига юклатилади. Жумладан, сув хўжалиги иншоотлари ва тармоқларини қуриш учун ер участкаларини ўз вақтида ажратиш, лойиҳа бўйича қурилиши режалаштирилган жойларда жойлашган кўчмас мулк объектларини бошқа жойга кўчириш, мулкдорларга тегишли компенсация тўлаш бўйича топшириқлар берилди.
2019 йили Самарқанд шаҳрида 2022 йил охиригача қарийб юз километр йўл таъмирланиб, қурилиши, туннел ва кўприклар қурилиши маълум бўлганди. Ҳокимият томонидан бу ишлар учун 2,7 триллион сўм (320 миллион долларга яқин) маблағ ажратилди. Самарқандни ободонлаштириш бўйича қурилиш-таъмирлаш ишлари жорий йилнинг 15-16 сентябрь кунлари ушбу шаҳарда бўлиб ўтадиган Шанхай ҳамкорлик ташкилоти (ШҲТ) саммитига тўғри келди.
