"Братан" фильмидан кадр
31 августдан 10 сентябрьгача давом этадиган 79-Венеция кинофестивалида кинорежиссёр Бахтиёр Худойназаровнинг 1991 йилли Тожикистонда суратга олинган «Братан» («Акахон») фильми намойиш этилади. Фильм намойиши 2 ва 3 сентябрь кунлари бўлиб ўтади.
Лента яна 18 та бадиий ва 9 та ҳужжатли фильмлар билан биргаликда «Венеция классикаси» дастурига киритилган. Дастурда кино ва унинг ижодкорлари ҳақидаги қайта тикланган дурдона асарлар ва ҳужжатли фильмлар тақдим этилади. Дастур 2012 йили танловдан ташқари сифатида пайдо бўлган, 2013 йилдан бери махсус ҳакамлар ҳайъати реставрация сифатини баҳолайди ва энг яхши иш учун фахрий мукофотни беради.
«Братан» Бахтиёр Худойназаровнинг road movie жанрида суратга олинган биринчи бадиий фильми бўлиб, кўп йиллар аввал оилани тарк этган икки ака-уканинг отаси олдига саёҳати ҳақида ҳикоя қилади. «Бунинг учун улар ажойиб поездда Тожикистон орқали, адирлар ва тоғлар, шаҳарлар ва қишлоқлар орқали Афғонистон чегарасигача борадилар. Саргузаштли саёҳатдан сўнг улар ниҳоят оталарини учратишади «, дейилади кинофестивал веб-сайтидаги лентанинг қисқача тавсифида.
«Братан» фильмининг премьераси 1991 йилда Москва халқаро кинофестивалида бўлиб ўтган, деб эслайди «Ховар». Фильм Берлин кинофестивалининг «Форум» дастурида иштирок этган, турли жаҳон кинофестивалларида 25 дан ортиқ мукофотларга сазовор бўлган, жумладан Турин кинофестивалида (Италия) энг яхши картина учун мукофот ва Маннгейм кинофестивалининг (Германия) Гран-присини қўлга киритган. Лента ўнта мамлакатда намойиш учун сотилган, сотувлар миқдори тахминан 400 минг долларни ташкил этган.
Бахтиёр Худойназаров. ТАСС фотосурати
Венеция кинофестивалида фильмни реставрация билан шуғулланган Германиянинг Veit Helmer-Filmproduktion компанияси раҳбари Файт Хельмер ва «Кинотавр» фестивали дастур директори Ситора Алиева тақдим этади.
Венеция кинофестивалидаги намойишдан сўнг фильм Лиондаги Люмьер фестивалида, кейин эса Сан-Паулу (Бразилия) ва Панамадаги намойишларда намойиш этилади.
