Nuz.uz сайти фотосурати
Самарқанд халқаро аэропортида Ўзбекистонда илк бор E-gates автоматик чегара назорати тизими ишга туширилди. Бу ҳақда Nuz.uz хабар берди.
E-gates дастурий-аппарат тизими Давлат хавфсизлик хизмати (ДХХ) чегара қўшинлари буюртмасига асосан Ўзбекистоннинг Metall Center компанияси томонидан ишлаб чиқилган. У шахсни автоматик аниқлаш имконини беради ва чегара назорати ходимларининг минимал иштироки билан чегарани тез ва хавфсиз кесиб ўтиш имконини беради.
Биометрик технологияларга асосланган чегарадан ўтишнинг автоматлаштирилган тизими — ҳужжатларни ўқиш мосламалари, видеокузатув ва йўловчиларнинг биометрик маълумотларини шахсини тасдиқловчи ҳужжатлар билан солиштиришни амалга оширувчи юқори аниқликдаги видеокамераларни ўз ичига олади.
E-gates тизимидан фойдаланган ҳолда чегара назоратидан ўтиш қуйидагича амалга оширилади:
👉 йўловчи биометрик паспортни e-gatesни сканерлаш ойнасига қўяди;
👉 Ҳужжатдаги маълумотлар ва биометрик фотосурат автоматик равишда маълумотлар базасига киритилади, шундан сўнг чекловчи рўйхатлар билан таққослаш амалга оширилади;
👉 Агар йўловчининг рўйхатларга алоқадорлиги аниқланмаса, у ярим дақиқа ичида чегарани кесиб ўтади, акс ҳолда тизим сигнал беради.
Тизим, шунингдек, рухсатсиз ўтишдан ҳимоя қилади ва бир марталик ўтишни таъминлаш алгоритмлари, багаж ва қаровсиз қолган нарсаларни таниб олади.
«Ушбу лойиҳа билан биз давлат чегараси орқали ўтиш вақтини қисқартириш, йўловчиларга қулайлик яратиш, инсон омилига асосланган хатоларни бартараф этиш орқали туризм салоҳиятини оширишга ҳисса қўшамиз», — деб тушунтиради Самарқанд аэропорти чегара назорати бўлими.
Ўтган йили қарийб 83 миллион долларлик лойиҳа доирасида аэропорт реконструкция қилинди. Бу ерда учиш-қўниш йўлаги қайта қурилди, соатига 800 йўловчига хизмат кўрсатиш имкониятига эга янги терминал барпо этилди, замонавий энергия тежовчи ёритиш ускуналари ва ИCАОнинг 2-тоифали қўниш тизими ўрнатилди.
