18 июль куни Грузия Бош вазири Ираклий Гарибашвили бошчилигидаги ҳукумат делегацияси Ўзбекистонга келди. Бу ҳақда Ўзбекистон Инвестициялар ва ташқи савдо вазирлиги (ИТСВ) матбуот хизмати хабар берди.
Тошкент аэропортида меҳмонларни Бош вазир Абдулла Арипов ва Бош вазир ўринбосари – ИТСВ раҳбари Жамшид Хўжаев кутиб олди. Ташриф дастури «Янги Ўзбекистон» боғига ташриф буюришдан бошланди, у ерда Ираклий Гарибашвили Мустақиллик монументи пойига гул қўйди. Кейин меҳмонлар технопаркга ташриф буюриб, ишлаб чиқариш жараёни ва маҳаллийлаштирилган юқори технологияли маҳсулотлар турлари билан танишдилар.
«Грузия Бош вазири Ўзбекистоннинг улкан сармоявий ва саноат салоҳиятига эътибор қаратди, шу нуқтаи назардан, бугунги кунда икки томонлама шерикликнинг устувор йўналиши янги қўшма лойиҳаларни ишлаб чиқиш ва амалга ошириш мақсадида икки мамлакат ишбилармон доиралари ўртасидаги тўғридан-тўғри алоқаларни кенгайтириш бўлиб қолмоқда», — деб таъкидлади ИТСВ.
Ташриф доирасида Грузия ҳукумати раҳбари олий даражада икки томонлама учрашувлар ўтказади.
Вазирлик Ўзбекистон ва Грузия ўртасида эркин савдо режими мавжудлигини эслатди. Ўзбекистон Грузияга асосан саноат товарлари, кимё маҳсулотлари, ичимликлар, автомобиллар ва транспорт ускуналарини етказиб беради. Грузия, ўз навбатида, фармацевтика маҳсулотлари, транспорт ускуналари, озиқ-овқат маҳсулотлари ва бошқа маҳсулотларни етказиб беради.
2017 йилдан буён мамлакатлар ўртасидаги товар айирбошлаш ҳажми 34,3 фоизга ўсиб, 127,4 миллион долларни ташкил этди.
Ўзбекистон ҳудудида Грузия капитали иштирокидаги 69 та корхона фаолият юритмоқда. Грузияда эса Ўзбекистон сармояси иштирокида 23 та корхона фаолият кўрсатади.
