Янги уйлар. ЎзА фотосурати
Ўзбекистон ҳукумати фуқаролари Ўзбекистонда яшаш рухсатномасисиз кўчмас мулк сотиб олиши мумкин бўлган давлатлар рўйхатини тасдиқлади. Бу ҳақда Вазирлар Маҳкамасининг 13 июлдаги қарорига таяниб, Spot.uz хабар беради.
Рўйхатга Арманистондан ташқари барча постсовет давлатлари, Европа Иттифоқининг барча аъзолари, Туркия, Гондурас, Жанубий Африка, Швейцария, Буюк Британия, АҚШ, Канада, Япония, Жанубий Корея, Австралия, Науру ва бошқалар, жами 108 та давлат киради.
Ушбу мамлакатлар фуқаролари яшаш учун рухсатномасиз Ўзбекистонда нархи белгиланган чегарадан юқори нархдаги уй-жойларни сотиб олишлари мумкин бўлади.
Тошкент шаҳри, Тошкент вилояти ва Самарқандда хорижликлар қурилиш вақтида 150 000 АҚШ долларидан, 3 йил аввал фойдаланишга топширилган янги бино учун эса 180 000 АҚШ долларидан бошлаб уй-жой олиш имкониятига эга бўладилар. Бошқа ҳудудларда минимал чегара мос равишда 70 000 ва 85 000 долларни ташкил қилади.
Қарорда IT Visa эгалари ва уларнинг оила аъзолари (турмуш ўртоқлари, ота-оналари ва болалари) учун уй сотиб олаётганда унинг нархига ҳеч қандай чекловлар қўйилмаслиги ва улардан яшаш учун рухсатнома талаб этилмаслиги таъкидланган.
Эслатиб ўтамиз, хорижликларга Ўзбекистонда яшаш рухсатномасисиз кўчмас мулк сотиб олиш ҳуқуқини бериш тўғрисидаги фармон шу йилнинг апрель ойида Президент Шавкат Мирзиёев томонидан имзоланган эди. Қарор хусусийлаштириш жараёнини тезлаштириш, инвестиция муҳитининг жозибадорлигини ошириш ва инвесторлар учун қўшимча қулайликлар яратиш нияти билан изоҳланади.
Фармонда таъкидланганидек, хорижликлар томонидан юқорида кўрсатилган шартларда кўчмас мулк сотиб олиш Ўзбекистонда доимий прописка ва прописка олиш учун асос бўлмайди. Яшаш учун рухсатнома олиш учун Тошкент шаҳри ва Тошкент вилоятида нархи камида 300 000 АҚШ долларини ташкил этувчи кўчмас мулк сотиб олиш лозим бўлади. Ушбу имконият 111 давлат, жумладан, 12 та постсовет мамлакатлари (Арманистон ва Туркманистондан ташқари), шунингдек, Хитой, АҚШ, Канада, Япония ва бошқалар фуқаролари учун мавжуд.
