Ўзбекистон президенти матбуот хизмати фотосурати
Ўзбекистон ҳукумати Википедияда Ўзбекистон ҳақидаги мақолалар сонини кўпайтириш учун 10 миллиард сўм (тахминан 1 миллион доллар) ажратади. Бу ҳақда мамлакат президенти Шавкат Мирзиёев 30 июнь куни «Янги Ўзбекистон» боғида Ёшлар куни муносабати билан сўзлаган нутқида маълум қилди.
Президентнинг сўзларига кўра, у нутқидан олдин Википедияда ўзбек тилида 10 мингдан ортиқ мақола жойлаштирган бир гуруҳ ёшлар билан учрашган. Бу хабар Мирзиёевни хурсанд қилди ва бу рақамни ўн баробар ошириш бўйича топшириқ берди.
«Бунда матн ва видеоматериаллардан фойдаланган ҳолда миллий давлатчилигимиз тарихи билан кенг таништиришга алоҳида эътибор қаратиш лозим», – деди президент.
У интернет тармоғида ўзбекларнинг 100 та буюк аждодлари – олим ва мутафаккирлар ҳақида маълумотлар базасини яратиш, уларнинг меросини оммалаштириш режаларини маълум қилди.
«Википедияда ўзбек тилидаги мақолалар сонини 100 мингтага етказиш ва хорижий тилларда ҳам Ўзбекистон ҳақидаги маълумотларни жойлаштириш яхши самара бериши шубҳасиз. Ушбу мақсадлар учун 10 миллиард сўм маблағ йўналтирилади», — деди Мирзиёев.
Ўша куни ёшлар билан бўлиб ўтган учрашувларнинг бирида давлат раҳбари Ўзбекистон тарихи ўттиз бир йил эмас, уч минг йиллик тарихга эга», эканини таъкидлади.
«Аждодларимиз икки Ренессанс даврига асос солган. Энди биз Учинчи Ренессанс даврининг пойдеворини қурмоқчимиз. Биз кимга таянамиз? Сиз ёшларга. Бу борадаги энг муҳим таянчимиз – таълимдир», — деди президент.
У ўз сўзида ёшлар учун яратилаётган имтиёз ва имкониятларни санаб ўтди. Жумладан:
🟢 «Ёшлар дафтари»га киритилган 18 ёшдан 30 ёшгача бўлган фуқаролар учун берилган имтиёз ва преференсиялардан эндиликда 14-17 ёшдаги қарийб 3 миллион ўғил-қиз фойдаланиши мумкин бўлади;
🟢 ушбу имтиёз ва преференсиялар сони 11 тадан 25 тага оширилади.Масалан, замонавий касблар, ахборот технологиялари ва хорижий тилларни ривожлантириш учун ушбу дафтарга киритилган ҳар бир шахсга ойига 1,2 миллион сўм (100 доллар) миқдорида субсидия ажратилади. . Уларга фан, спорт, санъат ва маданият йўналишлари бўйича тўгаракларда 6 ой давомида 300 000 сўм (27 АҚШ доллари) миқдорида ҳақ тўланади;
🟢 «темир», «аёллар» ва «ёшлар» дафтарларига киритилган оилалар учун (бу рўйхатларга ижтимоий қўллаб-қувватлашга муҳтож, кам таъминланган фуқаролар киради. – «Фарғона» изоҳи) йилига бир марта болалар учун мактаб формаси ва ўқув жиҳозлари олиш харажатлари давлат томонидан қопланади.
🟢 2022-2023-ўқув йилидан бошлаб «мақом ижрочилиги», «мақом чолғу ижрочилиги», «бахши санъати» ва «фортепиано» йўналишлари бўйича қабул қилинган талабаларнинг шартнома суммаси тўлиқ давлат томонидан қопланади;
🢢 хусусий таълим муассасаларида IТ йўналиши бўйича ўқиш истагида бўлган ёшларга 20 миллион сўм (1,8 минг доллар)гача бўлган 4 йиллик имтиёзли кредит берилади;
🟢 хорижий тилларни ўрганишни рағбатлантириш мақсадида бу борада яхши натижа кўрсатган талабаларни давлат ҳисобидан Буюк Британияга саёҳатга юборишга қарор қилинди. Шундай қилиб, жорий йилда 70 нафар талаба ва уларнинг 14 нафар ўқитувчилари рағбатлантирилади;
🢢 ёшларга бизнес лойиҳаларини амалга ошириш учун жами 250 миллиард сўм (23 миллион доллар) субсидия ва компенсациялар ажратилади;
🢢 республиканинг 70 та туманида ёшлар қишлоқ хўжалиги кластерлари ташкил этилиб, уларда 400 минг нафар ўғил-қиз иш билан таъминланади.
Мирзиёев ўз нутқида ўзбекистонлик ёшлар эришаётган ютуқларни қайд этди. Жорий йилда 382 нафар ўзбекистонлик спортчи йирик халқаро мусобақаларда 419 совринни қўлга киритди. Мактаб ўқувчилари ва талабалар халқаро фан олимпиадаларида 255 медалга сазовор бўлган. Президент мактабларининг 424 нафар битирувчисининг барчаси олий ўқув юртларига ўқишга кирди, улардан 102 нафари ёки 24 фоизи етакчи хорижий олий таълим муассасаларида таҳсил олмоқда. Охирги икки йилда «Эл-юрт умиди» жамғармаси орқали 400 нафар ўзбекистонлик энг яхши хорижий олий ўқув юртларига ўқишга юборилган.
