Uzbekistan GTL заводи Ўзбекистон нефт-кимё саноати тарихидаги биринчи синтетик нефть партиясини ишлаб чиқарди. Бу ҳақда «Ўзбекнефтгаз» АЖ матбуот хизмати хабар берди.
«Ушбу воқеа республикамизда замонавий нефть-кимё, нефть ва газни қайта ишлаш саноатини ривожлантиришнинг янги технологик босқичи бўлиб, бу кун рамзий маънода тарихий кун ҳисобланади – Ўзбекистонда биринчи марта синтетик суюқ ёқилғи ишлаб чиқариш йўлга қўйилди», — дейилади хабарда.
Корхонада синтетик мой олиш учун зарур бўлган синтез газини ишлаб чиқариш 14 июнь куни тўлиқ йўлга қўйилгани маълум бўлди. 15 июнга ўтар кечаси у биринчи марта синтетик суюқлик ишлаб чиқарадиган Фишер-Тропш реакторларига юборилди. Олинган модданинг таҳлили реакторда синтетик мой ҳосил бўлганлигини тасдиқлади.
Синтетик нефть ҳозирда оралиқ маҳсулот идишида сақланмоқда. Келгусида ундан синтетик дизел ёқилғиси, авиакеросин, нафта ва суюлтирилган газ ишлаб чиқариш учун фойдаланилади.
«Ўзбекнефтгаз» акциядорлик жамияти матбуот хизматининг таъкидлашича, «комбинатнинг 11 мингга яқин ускуна ва асосий ишлаб чиқариш бўлинмаларини ишга тушириш, синхрон ишлашини таъминлаш, шунингдек, уларни тўлиқ назорат қилиш ва бошқаришнинг барча асосий жараёни Uzbekistan GTL заводи мутахассислари мустақил равишда, бевосита хорижий экспертлар иштирокисиз амалга оширилмоқдалар».
Синтетик ёқилғи ишлаб чиқариш заводи – Uzbekistan GTL 2021 йил 25 декабрда мамлакат Президенти Шавкат Мирзиёев иштирокида ишга туширилди. Завод Қашқадарё вилоятининг 135 гектар майдонини эгаллайди. Дунёда атиги тўртта шундай йирик комплекс бор — Қатар, Нигерия, Жанубий Африка ва Малайзияда.
Қиймати 3 миллиард 420 миллион долларни ташкил этган завод йилига 3,6 миллиард куб метр табиий газни ишлаб чиқариш қувватига эга. У 307 минг тонна самолёт ёқилғиси, 724 минг тонна дизел ёқилғиси, 437 минг тонна нафта, 53 минг тонна суюлтирилган газ ишлаб чиқариш қувватига эга. Ушбу маҳсулотларни ишлаб чиқариш ҳисобидан импорт ўрнини босиш йилига 500 миллион долларни ташкил этиши, 200 миллион долларлик экспорт ҳажми ва бюджетга икки триллион сўм (185 миллион доллар) солиқ тушумлари таъминланиши кутилмоқда.
Шавкат Мирзиёевнинг сўзларига кўра, Uzbekistan GTL ўзини электр энергияси билан таъминлайди, бу энергия завод ишлаб чиқарадиган буғдан олинади. Шундай қилиб, йилига 650 миллион кВт/соат қувват олиш мумкин, бу ҳажм Шўртан газ-кимё мажмуаси ва яна бир янги корхонани ҳам электр энергияси билан таъминлашга етарлидир.
